Vergidə şəffalığı təmin etmək və ümumiyyətlə, başqa korrupsiya hallarına yol verilməməsi üçün vergidən olan ödəmələr bir milyard manatdan çox azaldıldı.

Bu sözləri Axar.az-a açıqlamasında vergilərdən büdcəyə daxil olan məbləğin azaldılması haqda danışan Milli Məclisin İqtisadiyyat, sənaye və sahibkarlıq komitəsinin üzvü Vahid Əhmədov deyib. Deputat sözügedən məsələnin səbəblərinə belə aydınlıq gətirib:

“Vergidə şəffalığı təmin etmək və ümumiyyətlə başqa korrupsiya hallarına yol verilməməsi üçün vergidən olan ödəmələr bir milyard manata yaxın azaldıldı. Bunun üçün isə Neft Fondundan müəyyən qədər əlavə vəsait ayrıldı. Eyni zamanda, bu məsələ gömrükdən gələn vergilər hesabına da maliyyələşdiriləcək. Burada əsas məqsəd sahibkarların normal fəaliyyətini təmin etməkdən və onlara qarşı təzyiqlərin qarşısını almaqdan ibarətdir”.

Millət vəkili bildirib ki, dövlət büdcəsinin gəlir və xərc hissəsinə 2 milyard 17 milyon manat əlavə edildi:

“Müəyyən qədər vəsait, əmək haqqı və pensiyaların artırılmasına, müəyyən qədər vəsait isə neft şirkətlərində qazma işlərinin davam etdirilməsinə ayrılacaq. Bu, əlavə dəyərin yaradılması üçün vacibdir”.