Bu ilin yanvar ayında Azərbaycandan Türkiyəyə ümumilikdə 795,39 milyon kubmetr təbii qaz ixrac edilib.

İndex.az xəbər verir ki, bu barədə Türkiyənin Enerji Bazarını Tənzimləmə Qurumunun (Enerji Piyasası Düzenleme Kurumu – EPDK) hesabatında qeyd olunub.

Məlumata görə, bu, 2024-cü ilin ilk ayı ilə müqayisədə 9,38 % azdır.

Bununla da yanvarda Azərbaycan Türkiyəyə təbii qaz ixrac edən üçüncü ölkə olub. Türkiyənin ümumilikdə idxal etdiyi təbii qazın 12,39 %-i Azərbaycanın payına düşüb.

Xatırladaq ki, ötən ilin yanvar ayında Azərbaycan Türkiyəyə 877,74 milyon kubmetr təbii qaz ixrac edib.

Ümumilikdə isə yanvarda Türkiyə ümumilikdə 6 milyard 418,88 milyon kubmetr həcmində təbii qaz idxal edib ki, bu da 2024-cü ilin yanvar ayının göstəricisi ilə müqayisədə 4,1 % çoxdur.

Yanvarda Türkiyəyə qaz ixracına görə ilk yeri Rusiya tutub. İl ərzində Rusiyadan Türkiyəyə 2 milyard 781,41 milyon kubmetr təbii qaz ixrac olunub. Bu, 2024-cü ilin ilk ayı ilə müqayisədə eynidir.

Yanvarda ikinci yerdə ABŞ qərarlaşıb. Bu ölkə həmin ay Türkiyəyə 1 milyard 576,76 milyon kubmetr qaz nəql edib. 2024-cü ilin yanvar ayı ilə müqayisədə ABŞ-dən Türkiyəyə qaz nəqli 29,42 % artıb.

Qeyd edək ki, Türkiyəyə Azərbaycanın “Şahdəniz” yatağından hasil edilən təbii qaz nəql edilir. Təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və Trans-Anadolu Təbii Qaz Kəməri (TANAP) vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.