2020-ci ilin ilk 6 ayında ABŞ vətəndaşlığından çıxmaq istəyənlərin sayı 5000 nəfəri ötüb.

Cebhe.info-nun xarici mətbuata istinadən xəbərinə görə, bu barədə ölkənin rəsmi mətbuat orqanları məlumat yayıb.

İlk yarımillikdə vətəndaşlıqdan çıxmaq üçün 5313 nəfər müraciət edib. Bu tendensiya davam edəcəyi təqdirdə ilin sonunadək Birləşmiş Ştatların 10 mindən çox vətəndaşını itirəcəyi güman edilir.

Son 10 ildə ABŞ vətəndaşlığından çıxanların sayı isə 37 min nəfərdir.

Mütəxəssislər bu tendensiyanın səbəbinin ABŞ xaricində yaşayan vətəndaşların hər il vergi bəyannamələrini doldurmaq məcburiyyətindən azad olmaq istəkləri ilə bağlı olduğunu bildiriblər.

ABŞ Dövlət Departamentinin məlumatına görə, təxminən 9 milyon ABŞ vətəndaşı ölkə xaricində yaşayır.