Nikola Yurçeviç: "Azərbaycan xalqına bayram hədiyyəsi bəxş etmək istəyirdik"

22-03-2019, 08:31           
Nikola Yurçeviç: "Azərbaycan xalqına bayram hədiyyəsi bəxş etmək istəyirdik"
"Xorvatiyanı qələbə münasibətilə təbrik edirəm. Əslində biz uduzmalı deyildik. Daha çoxuna layiq ola bilərdik. Heyf ki, bunu bacarmadıq və buradan xalsız qayıdırıq. Bununla belə, vuruşduq, çalışdıq. Dünyanın ən güclü komandalarından birinə qarşı oynadıq. Rəqib qrupun mütləq olaraq ən güclü komandasıdır. Bu görüş bizim gələcəyimiz, motivasiyamız üçün vacibdir. İyunda iki ev oyunumuz var və biz çoxlu xal toplaya bilərik".

"Report"un Zaqrebə ezam olunmuş əməkdaşının məlumatına görə, bunu Azərbaycan yığmasının baş məşqçisi Nikola Yurçeviç səfərdə Xorvatiya millisinə 1:2 hesabı ilə uduzduqları AVRO-2020-nin seçmə qrup oyunundan sonra jurnalistlərə açıqlamasında deyib.

53 yaşlı mütəxəssis daha sonra jurnalistlərin suallarını cavablandırıb:

- Oyun ərzində hakimə tez-tez etiraz edirdiniz. Bu, nə ilə əlaqədar idi?

- Mən yalnız subyektiv fikrimi bildirirdim. Epizodlardan uzaq idim. Fikrimcə, verilən qərarların bəziləri doğru deyildi. Rəqib qələbəyə daha layiq idi. Qələbəyə hakim qərarları ilə kölgə salmaq istəmirəm.

- Xorvatiya yığması sürəti artırdıqda, Azərbaycan yığması çatdırmırdı. Gələcək oyunlarda nə lazımdır ki, belə rəqiblərlə qarşılaşmalarda xal qazanmaq mümkün olsun?

- Bu oyuna ciddi hazırlaşmışdıq və hər şey oyunçulara çatdırmışdıq. Bəxtimiz gətirsəydi, xal qazana bilərdik. Top-komanda ilə oyunda belə alınması gözlənilməzdir. Çünki əvvəldən bunu demək olmazdı. Xalsız qalsaq da, oyunçulardan narazı deyiləm. Xorvatiya FIFA reytinqində 4-cü yerdədir, dünya vitse-çempionudur. Bəlkə də hissənin axırlarında qol buraxmasaydıq, xal qazana bilərdik.

- Oyunçularınız performansından razı qaldınız?

- Hansınısa qabartmaq və ya narazılıq etmək istəmirəm. Ola bilsin, hansısa fərqləndi, amma ümumilikdə komandanın performansından narazı deyiləm.

- Xorvatiya millisinin oyunu barədə nə düşünürsünüz?

- Həmişə ürəyim Xorvatiya ilə döyünüb. Amma bu gün istəyim xal əldə etmək idi. Təəssüf ki, alınmadı.

- Bu rəqibdən Bakıda xal götürmək mümkün olacaqmı?

- Qarşıdakı müddətdə komanda ilə işləmək üçün çox vaxt olacaq. Ümid edirəm ki, Slovakiya və Macarıstanla oyunlarda daha yaxşı performans göstərəcəyik. Bu görüşlər bizim üçün həlledici olacaq. Optimistəm və inanıram ki, qələbə qazana biləcəyik.

- Oyunçularınızdan razı qaldığınızı dediniz. Bəs özləri nə hiss edirlər?

- Onlar da mənim kimidirlər. Bir tərəfdən başa düşürlər ki, güclü komandaya qarşı oynadılar. Digər tərəfdən, qələbəni əldən verdikləri üçün üzgündürlər. Dostlar yazırlar ki, təbrik edirik, layiqli çıxış etdiniz. Azərbaycan xalqına bayram hədiyyəsi bəxş etmək istəyirdik. Təəssüf ki, alınmadı.












Teref.info © 2015
E-mail: [email protected]            Telefon: 051 933 93 21            Baş redaktor: Nurəddin (Xoca) İsmayılov
Məlumat internet səhifələrində istifadə edildikdə müvafiq keçidin qoyulması mütləqdir.