Sorğu iştirakçılarının bir qismi psixi pozuntuları olan şəxslərin, psixoloqa müraciət edənlərin, psixiatriya yardımından istifadə edənlərin "təhlükəli", "etibar olunmayacaq adam" olduqları barədə rəy bildirib.
Psixi sağlamlıq anlayışı və peşəkar yardım almaqla bağlı cəmiyyətdə bir sıra stereotiplər mövcuddur və stiqmatizasiya meylləri müşahidə edilir.
Sputnik Azərbaycan xəbər verir ki, bu fikirlər Ombudsman yanında "Psixi sağlamlıq və insan hüquqları" sahəsində İşçi Qrupun fəaliyyəti çərçivəsində aparılmış ictimai rəy sorğusunun və sosial şəbəkələrin monitorinqinin nəticələrində əks olunub.
Sorğu iştirakçılarının bir qismi psixi pozuntuları olan şəxslərin, psixoloqa müraciət edənlərin, psixiatriya yardımından istifadə edənlərin "təhlükəli", "etibar olunmayacaq adam" olduqları barədə rəy bildirib.
Bəzi respondentlər isə psixi pozuntulardan əziyyət çəkən şəxslərin ailə qurması və övlad dünyaya gətirməsinə qarşı olduqlarını, bu şəxslərin valideyn kimi öz öhdəliklərini yerinə yetirə biləcəklərinə şübhə etdiklərini bildiriblər.
Həmin şəxslərin əmək fəaliyyəti ilə məşğul olması, vəzifə funksiyalarını layiqincə yerinə yetirə bilməsi ilə bağlı da oxşar baxışlar mövcuddur.
Sorğuda qeyd edilib ki, ixtisaslı psixoloji və psixiatriya yardımı üçün müraciət etmək hələ də cəmiyyətdə sual doğuran və tərəddüd edilən bir vəziyyət hesab olunur.
Sorğuda iştirak edənlər bu sahə üzrə mütəxəssislərə müraciət etməyi bir sıra hallarda "arzuedilməz" hal kimi nəzərdən keçirdiklərini etiraf edərək ailə üzvləri, həmkarları, qonşuları tərəfindən qınanmaqdan, onlara "dəli", "ruhi xəstə" kimi damğa vurulacağından, nəticə etibarilə bunun onların şəxsi həyatı və karyeralarına mənfi təsirindən qorxduqlarını bildiriblər.