"OSIRIS-REx" missiyası tərəfindən Bennu asteroidindən Yerə gətirilən torpaq nümunələrinin analizi həyatın yaranmasında əsas rol oynayan üzvi birləşmələr və minerallar kompleksini aşkar edib.
Bu barədə Milli Aeronavtika və Kosmik Tədqiqatlar İdarəsindən (NASA) xəbər verilib.

Bildirilib ki, bu, bəşəriyyətin ən fundamental sirlərindən birini - planetimizdə həyatın necə yarandığını aydınlaşdıra biləcək inqilabi kəşfdir.

Alimlər nümunələrdə amin turşuları, karbohidrogenlər və su tərkibli fosfatlar daxil olmaqla 20-dən çox üzvi molekul növü aşkar ediblər.

"Bu komponentlər erkən dövrlərdə Yerə "həyat kərpicləri"nin çatdırılmasında həlledici rol oynaya bilərdi", - deyə layihənin baş elmi işçisi Dante Lauretta bildirib.

Tapılan birləşmələr arasında Yerdəki bütün canlıların genetik məlumat daşıyıcıları olan DNT və RNT-nin tikinti blokları olan purin əsasları var.

Bu kəşf məhz asteroid və kometlərin qədim okeanların ilkin "bulyonu"nda həyatın yaranması və inkişafının katalizatorları ola biləcəyi nəzəriyyəsini dəstəkləyir. 3,5-4 milyard il əvvəl Yerin bu kosmik "elçi"lər tərəfindən bombardmanı, ehtimal ki, lazımi üzvi "inqrediyent"lərin və suyun təchizatını təmin edərək biokimyəvi təkamül proseslərini başladıb.

250 qram ağırlığında olan nümunələr 2020-ci ildə Bennunun səthindən toplanıb və 2023-cü ilin sentyabrında uğurla Yerə çatdırılıb.

Alimlərin komandasına qoruyucu kapsulu steril şəraitdə açmaq və bu qiymətli materialın ilkin tədqiqatlarını aparmaq üçün təxminən iki il lazım olub.

"Bennu Günəş sistemində həyatın necə yarandığını başa düşməyə kömək edəcək zaman kapsuludur", - deyə NASA-nın direktoru Nikki Foks vurğulayıb.

"OSIRIS-REx" missiyasının nəticələri NASA-nın "Psyche" və "Ryugu" kimi asteroidlərin gələcək tədqiqatları üçün planlarını möhkəmləndirir.

Bu tədqiqatlar həm də potensial təhlükəli kosmik obyektlərdən Yerin müdafiəsi metodlarının işlənib-hazırlanmasına kömək edəcək.