Hava nəqliyyatında təhlükəsizliyi artırmaq üçün mühüm dəyişiklik edilib. Artıq bəzi əşyaların aviabaqajda aparılması qadağan olunacaq.

Demokrat.az xəbər verir ki, yanğın riski və ya təhlükəsizliyə təhlükə yarada bilən əşyaların ABŞ-a uçuşlarda baqaja aparılması qadağandır. Verilən açıqlamalara görə, artıq bu əşyalar yalnız əl yükündə daşınmalı olacaq.

Bu barədə Nəqliyyat Təhlükəsizliyi İdarəsi (TSA) və Federal Aviasiya İdarəsi (FAA) qərar qəbul edib.

Yeni qadağalara əsasən powerbank, telefon doldurma qutuları, əlavə litium-ion batareyalar, əlavə litium-metal batareyalar, telefon batareyaları, noutbuk batareyaları, xarici batareya paketlərinin və ya portativ şarj cihazlarının təyyarənin yük anbarında daşınması qadağandır.

FAA-nın məlumatına görə, bu akkumulyatorlar həddindən artıq istiləşə, alov ala bilər. Yük anbarında başlayan yanğınlar çox sürətlə yayıla və təyyarəni təhlükə altına qoya bilər. Buna görə də, bu cür əşyaların uçuş təhlükəsizliyini birbaşa təhdid edə biləcəyi üçün təyyarədə daşınması məhdudlaşdırılır.