Fransada növbəti cinsi istismar məhkəmə işi ölkəni sarsıtdı. Fransız cərrah Joël Le Scouarnec onilliklər boyunca əsasən uşaq və yeniyetmələrdən ibarət təxminən 300 nəfəri cinsi istismara məruz qoyduğu və zorladığı üçün ittiham olunur. Britan bölgəsində yerləşən Vannes şəhərində çərşənbə günü hökm oxundu.
Bu, Fransada indiyə qədər qeydə alınmış ən böyük uşaq istismarı hadisəsidir: Joël Le Scouarnec yüzlərlə cinsi hücum və zorlamaya görə məhkəmə qarşısına çıxarılıb.
Çərşənbə günü Vannes məhkəməsi ona ən ağır cəzanı – 20 il azadlıqdan məhrumetmə və bunun üçdə ikisini təhlükəsizlik tədbirləri çərçivəsində çəkmək şərtilə hökm verdi. Hökm həmçinin 15 il müddətində sosial nəzarət tədbirini də nəzərdə tutur.
Bundan əlavə, o, artıq heç bir tibb sahəsində işləyə bilməyəcək və azyaşlılarla bağlı hər hansı bir fəaliyyətlə məşğul olması qadağandır. Ona heyvan saxlamaq hüququ da qadağan edilib və seçki hüququndan da məhrum edilib. Prokurorluq çıxışında artıq ən yüksək cəzanı – 20 ili tələb etmişdi.
Hökmün elanından əvvəl zərərçəkmişlərin bir qrupunun təşkil etdiyi kollektiv məhkəmə binasının qarşısında insan zənciri ilə etiraz aksiyası keçirdi. Plakatlarda “Je t’accuse” (Səni ittiham edirəm) və “Un enfant violé, une vie violée” (Zorlanan bir uşaq, zorlanan bir həyatdır) kimi şüarlar yer alırdı.
Le Scouarnec-in 1989–2014-cü illər arasında təxminən 300 nəfəri, əsasən uşaqları cinsi istismara məruz qoyduğu bildirilir. Qurbanların orta yaşı cəmi 11 olub. Keçmiş cərrah oğlan və qız uşaqlarını müayinələr bəhanəsi ilə və ya narkoz altındaykən – əməliyyat otağında və ya oyandıqdan sonra – zorlayıb.
74 yaşlı Le Scouarnec cinayətlərini ətraflı şəkildə gündəlikdə qeyd edib. Prokurorluğun dediyinə görə, o, qurbanlarına cansız obyekt kimi yanaşır və heç bir empatiya göstərmirdi. Məhkəmə prosesi üç ay davam etdi, yüzlərlə şahid dindirildi, onlarca mülki iddiaçı iştirak etdi.
Məhkəmə prosesinin sonunda Le Scouarnec belə dedi: “Mən mərhəmət istəmirəm, sadəcə olaraq mənə o insaniliyin bir parçasını qaytarmaq haqqı verin ki, o mənim içimdə çatışmırdı.” Fransız xəbər agentliyinə (AFP) görə, məhkəmədə cinayətləri etiraf edib, lakin bəzi qurbanları xatırlamadığını bildirib və peşmanlıq göstərməyib. Müdafiə tərəfi isə bu etirafı “bir növ tövbə aktı” kimi dəyərləndirib və cəzanın yüngülləşdirilməsi üçün nəzərə alınmasını tələb edib.
Sarvan Səmədoğlu
TEREF