Arılar bitkilərin tozlanmasında əvəzsiz rol oynayırlar, həmçinin, insan orqanizmi üçün vacib vitaminlərlə zəngin bal istehsal edirlər. Lakin onların müdafiə mexanizmi olan sancma, bəzi insanlar üçün sadəcə keçici narahatlıq deyil, həyati təhlükə yarada bilən ciddi bir vəziyyətə çevrilə bilər.

Adətən arı sancması yerli şişlik, ağrı və qızartı ilə müşayiət olunsa da, allergiyası olan şəxslərdə bu hadisə sürətlə ağırlaşaraq ölümcül nəticələr doğura bilər.

Bəzi insanlar var ki, arı südü tərkibli kosmetik məhsul istifadə edəndə belə onların səhhəti pisləşir.

Mövzu barədə Bizim.Media-ya danışan tibb üzrə ekspert, həkim-terapevt Rasif Bağırov deyib ki, bütün həşərat sancması zamanı insan orqanizmi müxtəlif reaksiyalar verir:

“Təkcə arı yox, bütün həşəratların sancmasına görə insanın bədənində müxtəlif reksiyalar meydana çıxır. Çünki onların ağız suyu ilə insanın bədəninə neştəri vasitəsilə yeritdiyi hər hansı maddə insan bədəni üçün yad cisim hesab olunur. Orqanizmə daxil olmuş yad cisimlə insan orqanizminin həmin yad cismə verdiyi reaksiya, yəni yaratdığı antitellər qarışıqlı şəkildə bir-biri ilə mübarizəyə girirlər.

Həmin mübarizəni insan ölümü üçün təhlükəli olmayan səviyyədə tənzimləyən immun sisteminin supressor immun sistemi olmayanda xəstələr şoka düşür, ölürlər. Çünki o iki maddə arasında gedən mübarizəni supressor immun sisitemi tənzimləməlidir ki, ondan insan əziyyət çəkməsin. O funksiya çatmayanda ölümlə nəticələnir, bunun da olub olmamasını müəyyən etmək mümkün deyil”.