Ləğv edilmiş MTN-nin generalları barədə həmin qurumun yerində yaradılan Dövlət Təhlükəsizlik Xidməti istintaqa xasiyyətnamə təqdim edib.

“Qafqazinfo”nun əldə etdiyi məlumata görə, xasiyyətnamələrdə MTN zabitlərinin keçdikləri həyat yolu, aldıqları töhmətlər, mükafatlar və xidmət müddətindəki davranışları qeyd olunub.

General Sübahir Qurbanovun xasiyyətnaməsində qeyd olunub ki, 1954-cü ildə Masallı rayonunda anadan olub: “Azərbaycanlıdır. Ailəlidir. Ali təhsillidir - 1980-ci ildə Bakı Dövlət Universitetini bitirib.

Sübahir Qurbanov 1980-ci ilin dekabrından Daxili İşlər Nazirliyində zabit rütbəsində bir sıra vəzifələrdə işləyib, 2004-cü ilin avqust ayında keçmiş Milli Təhlükəsizlik Nazirliyinə həqiqi hərbi xidmətə qəbul edilib. Keçmiş MTN-də şöbə rəisi vəzifəsindən, sonuncu iş yeri olan - Transmilli Mütəşəkkili Cinayətkarlığa Qarşı Mübarizə Baş İdarəsinin rəisi vəzifəsinədək xidmət keçib. 2015-ci ilin oktyabr ayının 21-dən noyabr ayının 14-dək keçmiş MTN-in sərəncamında olub, 2015-ci ilin noyabr ayının 14-də keçmiş MTN-in müvafiq əmrinə əsasən “Hərbi xidmətkeçmə haqqında Əsasnamə”nin 156-cı maddəsinin “e” bəndinə (xidməti uyğunsuzluğa görə) müvafiq olaraq Silahlı Qüvvələrin ehtiyatına buraxılıb. 3-cü dərəcəli “Vətənə xidmətə görə” ordeni, “Hərbi xidmətlərə görə” medalı ilə təltif olunub”.

Daha sonra S.Qurbanovun cinayət əməlləri ümumi cümlələrdə təsvir edilib və “hərəkətləri ilə xüsusi xidmət orqanı əməkdaşının şərəfini ləkələdiyinə görə S.Qurbanov həqiqi hərbi xidmətdən xaric olunmaqla Silahlı Qüvvələrin ehtiyatına buraxılıb” deyə yazılıb. Xasiyyətnamədə onun işdən çıxarılma səbəbi bu göstərilsə də, əmrdə Əsasnamənin 156-cı maddəsinin “e” bəndi qeyd olunub. “Xüsusi xidmət orqanı əməkdaşının şərəfini ləkələdiyinə görə” tələbi isə Əsasnamənin “ə” bəndidir.

Qadın general Natəvan Mirvətova 1948-ci ildə Bakı şəhərində anadan olub: “Azərbaycanlıdır. Ailəlidir. Ali təhsillidir - 1970-ci ildə Azərbaycan Pedaqoji İnstitutunu bitirib.

N.Mirvətova 1971-ci ilin iyun ayından Azərbaycan SSR Daxili İşlər Nazirliyinin ştatı hesabına Azərbaycan SSR Dövlət Təhlükəsizlik Komitəsində işləyib, 1980-ci ilin mart ayında isə DTK-yə həqiqi hərbi xidmətə qəbul edilib. Keçmiş DTK - MTN-də 2-ci dərəcəli əməliyyat nəzarətçisi vəzifəsindən, sonuncu iş yeri olan - ləğv olunmuş MTN-in Əməliyyat-texniki idarəsinin rəisi vəzifəsinədək xidmət keçib. 2015-ci ilin oktyabr ayının 22-dən etibarən Dövlət Təhlükəsizliyi Xidmətinin sərəncamındadır.

Xidmət müddəti ərzində 42 dəfə müxtəlif növ mükafatlara layiq görülüb. 1998-ci ildə “Azərbaycan Bayrağı”, 2013-cü ildə 3-cü dərəcəli “Vətənə xidmətlərə görə” ordenləri və 1995-ci ildə “Hərbi xidmətlərə görə”, 2002-ci ildə Vətən uğrunda”, 2005-ci ildə “İgidliyə görə” medalları ilə təltif olunub.

N.Mirvətovanın şəxsi işində mövcud olan - polkovnik hərbi rütbəsi verilməsi ilə bağlı keçmiş MTN-in Əməliyyat-texniki idarəsində onun bilavasitə rəisi tərəfindən 26 may 2004-cü il tarixdə yazılmış sonuncu xidməti xasiyyətnamədə o, savadlı, intizamlı, işgüzar, tabeliyində olan əməkdaşları mühüm məsələlərin həllinə peşəkarlıqla səfərbər edən, üzərinə düşən vəzifələrin öhdəsindən layiqincə gələn, özünə və tabeliyində olan əməkdaşlara qarşı tələbkar, eyni zamanda onlara qayğı ilə yanaşan rəhbər işçi kimi qiymətləndirilib və ümumən müsbət keyfiyyətlərə malik şəxs kimi səciyyələndirilib.

General-mayor N.Mirvətovaya 2003-cü ilin yanvar ayında keçmiş MTN-in Əməliyyat-texniki idarəsinin rəis müavini - şöbə rəisi vəzifəsində işləyərkən, işində yol verdiyi nöqsanlara görə sabiq nazir Namiq Abbasov tərəfindən “şiddətli töhmət” intizam cəzası verilib, həmin ilin avqust ayında intizam tənbehi üzərindən götürülüb. Xidmət dövründə digər intizam cəzaları almayıb”.

General Teymur Quliyev 1967-ci ildə Naftalan şəhərində anadan olub: “Azərbaycanlıdır. Ailəlidir. Ali təhsillidir - 1990-cı ildə Leninqrad Maliyyə-kredit İnstitutunun Bakı filialını, 2001 -ci ildə isə Bakı Dövlət Universitetini bitirib.

T.Quliyev 1991-ci ilin yanvarından Daxili İşlər Nazirliyində zabit rütbəsində bir sıra vəzifələrdə işləyib, 2004-cü ilin oktyabr ayında isə keçmiş Milli Təhlükəsizlik Nazirliyinə həqiqi hərbi xidmətə qəbul edilib. Keçmiş MTN-də bölmə rəisi vəzifəsindən, sonuncu iş yeri olan - Monitorinq mərkəzinin rəisi vəzifəsinədək xidmət keçib. 2015-ci ilin oktyabr ayının 20-dən etibarən Dövlət Təhlükəsizliyi Xidmətinin sərəncamındadır.

Keçmiş MTN-də xidmət müddəti ərzində 14 dəfə müxtəlif növ mükafatlara layiq görülüb. 2007-ci ildə “Hərbi xidmətlərə görə” və 2013-cü ildə “İgidliyə görə" medalları ilə təltif olunub.

T.Quliyevin şəxsi işində mövcud olan - növbəti polkovnik hərbi rütbəsi verilməsi ilə bağlı keçmiş MTN-in Kadrlar baş idarəsinin rəisi tərəfindən 19 sentyabr 2011-ci il tarixdə yazılmış sonuncu xidməti xasiyyətnamədə o, intizamlı, işgüzar, mürəkkəb şəraitdə düzgün qərar qəbul etməyə bacaran, təşkilatçılıq qabiliyyətinə və analitik təfəkkürə malik olan, qarşıya qoyulan vəzifələri layiqincə yerinə yetirən rəhbər işçi kimi qiymətləndirilib və ümumən müsbət keyfiyyətlərə malik şəxs kimi səciyyələndirilib. General-mayor T.Quliyev həqiqi hərbi xidmətdə olduğu dövrdə intizam cəzası almayıb.