Azərbaycan, Türkiyə və Pakistan arasında əməkdaşlıq, tarixi və mədəni köklərə əsaslanan, qarşılıqlı etimada söykənən çoxşaxəli və strateji bir tərəfdaşlıq nümunəsidir. 28 may 2025-ci ildə Prezident İlham Əliyevin Laçın şəhərində etdiyi çıxış bu üç qardaş ölkə arasında münasibətlərin nə qədər dərin və sarsılmaz olduğunu bir daha nümayiş etdirdi.
Prezident İlham Əliyev çıxışında bildirdi ki, Azərbaycan, Türkiyə və Pakistan arasında həm çətin, həm də xoş günlərdə bir-birinə dəstək göstərilməsi bu əməkdaşlığın təməl prinsiplərindəndir. 44 günlük Vətən müharibəsi zamanı Türkiyə və Pakistanın siyasi və mənəvi dəstəyi Azərbaycan xalqına əlavə güc vermiş, Qələbəyə aparan yolda ruhlandırıcı rol oynamışdır. Bu dəstək ölkələr arasında əlaqələrin yalnız diplomatik deyil, həm də emosional və tarixi əsaslara söykəndiyini sübut edir.
Laçında baş tutan üçtərəfli zirvə görüşü və tədbirlər əməkdaşlığın daha da dərinləşəcəyini göstərir. Artıq bu münasibətlər yeni mərhələyə qədəm qoyur – strateji müttəfiqliyə. Liderlərin iştirakı ilə işğaldan azad olunmuş ərazilərdə keçirilən tədbirlər bu birliyin rəmzi və real təzahürüdür.
Rəsmi mənbələrə görə, 2025-ci ildə keçirilən görüşlərdə regional təhlükəsizlik, iqtisadi əməkdaşlıq, müdafiə sənayesi və mədəni mübadilə məsələləri müzakirə olunmuş, birgə layihələrin icrası istiqamətində razılaşmalar əldə edilmişdir. Xüsusilə nəqliyyat, enerji və müdafiə sahələrində üçtərəfli əməkdaşlığın genişləndirilməsi nəzərdə tutulur.
Bu gün Azərbaycan, Türkiyə və Pakistan regionda sülhün, inkişafın və sabitliyin təminatçılarıdır. Onların birliyi yalnız üç ölkəyə deyil, bütün müsəlman dünyasına və qlobal təhlükəsizlik sisteminə müsbət təsir göstərmək gücünə malikdir.

Türkan Cümşüdova – YAP üzvü