Estoniya hesab edir ki, 1920-ci il Tartus razılaşması qüvvədədir.

Axar.az xəbər verir ki, bunu parlamentin spikeri Henn Pılluaas deyib.

Onun sözlərinə görə, razılaşma çərçivəsində Pskov və Leninqrad vilayətlərinin tərkibinə daxil olan bəzi torpaqlar Estoniyaya verilməlidir. O bu razılaşma sayəsində Estoniya ilə Rusiya arasında sərhədin müəyyənləşdirildiyini və beynəlxalq hüquq nöqteyi-nəzərdən onun hələ də qüvvədə olduğunu bildirib. Pılluas Rusiya ilə 2014-cü ildə sərhədlərin müəyyənləşdirilməsi ilə bağlı imzalanan razılaşmanı parlamentdə ratifikasiya etməyəcəklərini söyləyib.

Qeyd edək ki, Tartus razılaşması 1920-ci ildə Rusiya Sovet Federativ Sosialist Respublikası ilə Estoniya arasında imzalanıb. Razılaşmaya əsasən Pskov quberniyasının bir hissəsi, eləcə də Leninqrad əyalətindəki ərazilərin bəziləri Estoniyaya verilməli idi. 1944-cü ildə SSRİ-nin Estoniyanın işğalından sonra Rusiya bu əraziləri özünə birləşdirib. Moskva ilə Estoniya arasında yeni sərhəd razılaşması 2005-ci ildə imzalanıb. Razılaşmanın ratifikasiyası zamanı Estoniya ora Tartus razıalşmasına instinadla bağlı əlavə yerləşdirib. Moskva sonradan bu razılaşmanın qəbuledilməz olduğunu bildirib ki, bu da tərəflərin 2014-cü ildə yeni sərhəd razılaşmasının layihəsini imzalamasına gətirib çıxarıb. Razılaşma hər iki tərəfin parlamentinə təsdiq üçün göndərilib.