ABŞ Dövlət Departamenti Anqolanın keçmiş prezidentinin Bakıda anadan olmuş qızı İzabel duş Santuşa qarşı məhdudiyyətlər tətbiq edib.

Belə ki, onun ABŞ-a girişinə qadağa qoyulub.

Vaxtilə “Forbes” jurnalının Afrikanın ən zəngin adamları siyahısında yer alan xanım dövlət vəsaitlərini şəxsi məqsədlər üçün mənimsəməkdə ittiham edilib.

Qeyd edək ki, İzabel duş Santuş 1979-2017-ci illərdə Anqolanın prezidenti olmuş Xose Eduardo duş Santuşun qızıdır. O, 1973-cü ildə atasının təhsili ilə əlaqədar Bakıda anadan olub. Xanım, həmçinin Rusiya vətəndaşlığına da sahibdir.

2013-cü ildə “Forbes” İzabeli Afrikanın ən varlı qadını adlandırıb və onun sərvətini 3,5 milyard dollar dəyərində qiymətləndirib. Nəşrin məlumatına görə, 2020-ci ilin ortalarında bu məbləğ 1,4 milyard dollaradək azalıb. 2021-ci ilin yanvarında jurnal onu siyahısından çıxarıb. Bu, duş Santuşun 2019 və 2020-ci illərdə Anqola və Portuqaliyadakı aktivlərinin ona qarşı açılan cinayət işlərinin bir hissəsi olaraq dondurulması səbəbindən baş verib.(oxu.az)