Konqresin Nümayəndələr Palatasının Kapitoliyə hücumunu araşdıran Komitəsi, 2020-ci il prezident seçkilərinin nəticələrini dəyişdirmək üçün Ağ Evin keçmiş aparat rəhbəri Mark Medouzun verdiyi ekstremal fəaliyyət planını öyrənir. Bu barədə RİA Novosti “New York Times”-a istinadən xəbər verir.

Məxfi sənədlərə əsasən, Trampa seçki nəticələrinin təsdiqini təxirə salmaq üçün fövqəladə vəziyyət elan etmək tövsiyə olunub. Bununla yanaşı, həmin plana əsasən, əksər ştatlarda səsvermə infrastrukturu Venesuela və Çin tərəfindən idarə olunduğu haqda bəyanat da verilməli idi.

Medouzun vəkili deyib ki, Medouz təqdimatı elektron poçtla alıb və onunla heç bir əlaqəsi olmayıb. Nəşr həmçinin sənədi Trampın tərəfdarlarına kimin tərəfindən yayıldığı barədə də məlumat verir: “Seçkilərə qarşı hərəkatda nüfuzlu söz sahibi olan, istefada olan polkovnik Fil Uoldron bildirib ki, “Seçki saxtakarlığı, xarici müdaxilə və 6 Yanvar üçün seçimlər” başlıqlı sənəd Trampın tərəfdarları və hücumdan əvvəl Kapitoliya təpəsində yayılıb”.

“New York Times”-ın qeyd etdiyi kimi, Uoldron təqdimatı Medouza şəxsən verməyib, lakin bunu onun komandasından kiminsə verdiyini də istisna etməyib.

Nümayəndələr Palatasının yaratdığı komissiya 6 yanvar hadisələrini araşdırır. Həmin hadisələrdə Kapitoliyə hücumun iştirakçıları Trampın Demokratlar Partiyasının namizədi Co Baydenin prezident seçkilərində qələbəsini Konqres tərəfindən təsdiq edilməsini pozmağa cəhd ediblər. Tramp bu günə kimi Co Baydenin legitimliyini mübahisələndirir.

virtualaz.org