ABŞ korrupsiyanın real təhlükə kimi göründüyü Ukraynaya yardım strategiyasının məxfi versiyasını hazırlayıb.

Strategiya, xüsusilə, korrupsiya ilə mübarizə, deoliqarxizasiya, qoşunların NATO standartlarına keçidi və ingilis dilinin dərindən öyrənilməsi istiqamətində islahatları nəzərdə tutur.

“AzPolitika.info” bu barədə “Politico”ya istinadla xəbər verir.

Nəşrin əldə etdiyi hesabatda Ukrayna institutlarının islahatına dair konkret planlar təfərrüatlı şəkildə verilir və xəbərdarlıq edilir ki, Qərbin dəstəyi korrupsiyanın azaldılmasından asılı ola bilər.

ABŞ-ın məxfi strategiya sənədində deyilir ki, Bayden administrasiyasının rəsmiləri açıq şəkildə etiraf etdiklərindən daha çox Ukraynadakı korrupsiyadan narahatdırlar.

ABŞ-ın uzunmüddətli planının "həssas, lakin təsnifləşdirilməmiş" versiyasında Vaşinqtonun Kiyevə sui-istifadə hallarının kökünü kəsməsinə yardım və Ukraynanın bir sıra sektorlarında islahatlara kömək etmək üçün atdığı çoxsaylı addımlar öz əksini tapıb. O vurğulayır ki, korrupsiya Qərb müttəfiqlərini Ukraynanın Rusiyanın təcavüzünə qarşı mübarizəsindən əl çəkməyə məcbur edə bilər və Kiyev rüşvətxorluğa qarşı mübarizəni təxirə sala bilməz.

Bu məxfi sənədin Dövlət Departamentinin açıqladığı ictimai versiyadan üç dəfə geniş olduğu bildirilir.

“Ukrayna üzrə İnteqrasiya Strategiyası”nın məxfi versiyasında ABŞ-ın Ukraynadakı məqsədləri, banklarının özəlləşdirilməsindən tutmuş ingilisdilli məktəblərin sayını artırmağa və ordusunu NATO protokollarını qəbul etməyə təşviq etməyə qədər daha çox təfərrüat var.

Bir çox məqsədlər korrupsiyanın azaldılmasına yönəlib.

Media hesab edir ki, Bayden administrasiyası rüşvətxorluğu azaltmaq üçün Ukraynaya təzyiq göstərmək istəyir, çünki Amerikanın yardımı təhlükə altındadır.