Braziliya sakinləri Ali Məhkəmənin ölkədə X sosial şəbəkəsini bloklamaq qərarına etiraz olaraq nümayişə çıxıblar.

SAVASH.MEDİA xarici KİV-ə istinadən xəbər verir ki, on minlərlə insanın qatıldığı mitinq Braziliyanın Müstəqillik Günündə San-Paulu şəhərinin mərkəzində keçirilib.

Qeyd edək ki, braziliyalıları bu addımı atmağa ölkənin eks-prezidenti Jair Bolsonaro çağırıb.

“Azadlığı olmayan bir ölkənin bu günü qeyd etmək haqqı yoxdur. Biz diktatorların tərəfində olan və ən əziz bildiyimiz dəyərə – azadlığımıza qarşı çıxan bir hökumətlə üz-üzəyik”, – deyə o, sentyabrın 4-də İnstaqramda yazıb.

Sabiq prezidentinin tərəfdarları mitinqə Braziliyanın milli rənglərində – sarı və yaşıl geyimdə çıxıblar. Sosial şəbəkələrdə yayılan görüntülərdə minlərlə insan görünür. Onlardan bəziləri X sosial şəbəkəsinin sahibi İlon Maska dəstək posterləri ilə mitinqə gəliblər.

Braziliyanın Ali Məhkəməsi avqustun sonunda ölkədə X-ə girişi bloklamaq qərarı şıxarıb. Sosial şəbəkəyə VPN vasitəsilə daxil olmağa görə cərimələr tətbiq edilib. Bu, hər gün 9 min dollardır. Qərara əsasən İlon Maskın SpaceX şirkətinin Starlink peyk internet xidmətinin hesabları dondurulub. Bu qərar X-dan 3 milyon dollar cərimə qoparmağa cəhd göstərməkdir.

Məhkəmə araşdırmasına X şəbəkəsinin Jair Bolsonaronun sağçı partiyası ilə əlaqədə olan qanunvericilərin və demokratiyanı pozmaqda ittiham olunan fəalların hesablarını bloklamaqdan imtina etməsi səbəb olub. “AtlasInte”nin sorğusuna əsasən, braziliyalıların demək olar ki, 51%-i məhkəmənin qərarı ilə razılaşmadığını, təxminən 48%-i isə bu addımı dəstəklədiyini bildirib.