Fransa və Ukraynanın xarici işlər nazirləri şənbə günü Kyivdə keçirilən birgə mətbuat konfransında bildiriblər ki, Şimali Koreyanın nizami qoşunlarının Rusiyanın Ukraynaya müdaxiləsini dəstəkləmək üçün cəlb edilməsi müharibənin ciddi şəkildə eskalasiyası olacaq.

Sentyabr ayında Fransanın xarici işlər naziri təyin olunandan bəri Ukraynaya ilk səfərini edən Jan-Noel Barronun həmçinin ölkənin şərqini ziyarət edəcəyi gözlənilir ki, Fransa bazar günü orada müharibədən zərər çəkən uşaqların müdafiəsi üçün iki yeni mərkəzin açılmasını maliyyələşdirəcək.

Ukrayna Prezidenti Volodimir Zelenski cümə axşamı Şimali Koreyanı Rusiya ilə yanaşı zabitlər yerləşdirməkdə və Moskvanın döyüş səylərinə kömək etmək üçün 10 min əsgər göndərməyə hazırlaşmaqda ittiham edib, baxmayaraq ki, NATO rəhbəri Mark Rutte hələ ki, Pxenyanın mövcudluğuna dair heç bir dəlilin olmadığını deyib.

"Bu, ciddi olardı və münaqişəni yeni mərhələyə, əlavə eskalasiya mərhələsinə sürükləyərdi," Barro Kyivdə deyib və əlavə edib ki, belə bir addım Moskvanın müharibədə çətinlik çəkdiyinə işarə edərdi.

Onun ukraynalı həmkarı Andrii Sıbiha deyib ki, bu addımın eskalasiyaya gətirib çıxarma riski "çox boyük"dür.

"Bu, Rusiyanın Ukraynaya qarşı aqressiyasının daha da genişlənməsinə dair böyük təhlükədir. Onun indiki miqyasından və sərhədlərindən kənara çıxması riski böyükdür," o deyib.

Zelenski bu həftənin əvvəlində qələbə planın təqdim edib və onun Ukraynaya müharibəni ən gec gələn il bitirməyə imkan verəcəyini deyib. Planın ilk addımı Ukraynanın NATO-ya qeyd-şərtsiz üzvlüyüdür.

Fransanın xarici işlər naziri deyib ki, Paris Ukraynanın dərhal NATO-ya üzvlüyünə dəvət almaq fikrinə açıqdır, lakin müttəfiqlərlə bu mövzuda danışıqlar davam etdiriləcək.

"Ukraynanın NATO-ya üzvlüyü ilə bağlı dəvətə gəlincə, biz buna açığıq və bu, tərəfdaşlarımızla apardığımız müzakirədir," Barro deyib.