Şimali Koreyanın əks-hücum imkanlarını nümayiş etdirmək üçün qanadlı raketləri sınaqdan keçirməsindən bir neçə gün sonra ABŞ-ın təyyarədaşıyan gəmisi bazar günü qüvvə nümayişi məqsədilə Cənubi Koreyaya gəlib.

Cənubi Koreya hərbi dəniz donanmasının bəyanatında deyilir ki, USS Carl Vinson təyyarədaşıyan gəmisi və onun zərbə qrupunun Cənubi Koreyanın Busan limanına gəlişi Şimali Koreyadan gələn davamlı təhdidlər qarşısında güclü ABŞ-Cənubi Koreya hərbi ittifaqını nümayiş etdirmək və müttəfiq qüvvələrin qarşılıqlı fəaliyyətini artırmaq məqsədi daşıyır.

Bildirilir ki, bu, iyun ayından Cənubi Koreyaya gələn ilk ABŞ təyyarədaşıyan gəmisidir.

Təyyarədaşıyan gəminin yerləşdirilməsinin Amerikanın bu kimi güclü hərbi mövcudluğunu təhlükəsizliyə ciddi təhdid hesab edən Şimali Koreya tərəfindən qəzəblə qarşılanacağı gözlənilir.

Şimali Koreya Amerika təyyarədaşıyanlarının, uzaq mənzilli bombardmançıların və nüvə sualtı qayıqlarının əvvəllər yerləşdirilməsinə bızi hallarda raket sınaqları ilə cavab verib.

Yanvarın 20-də inaqurasiya mərasimindən sonra prezident Donald Tramp diplomatiyanı canlandırmaq üçün Şimali Koreya lideri Kim Conq Unla yenidən əlaqə saxlayacağını bildirib. Şimali Koreya tərəfindən Trampın təkliflərinə birbaşa reaksiya verilməyib.

Şimali Koreya cümə günü bildirib ki, keçən həftənin əvvəlində rəqiblərini hərbi qüvvələrinin əks-hücum qabiliyyəti və nüvə əməliyyatlarına hazırlığı barədə məlumatlandırmaq üçün strateji qanadlı raketləri sınaqdan keçirib.

Şimalın bu il dördüncü raket sınağı olan buraxılışları izlədikdən sonra Kim öz hərbi qüvvələrinə nüvə silahlarından istifadə etməyə tam hazır olmağı əmr edib.

Ekspertlər Kimin yaxın gələcəkdə Trampın təklifini qəbul etməyəcəyini bildirirlər, belə ki, o, hazırda bütün diqqətini Rusiyanın Ukraynaya qarşı müharibəsini silah və əsgəri qüvvə ilə təmin etməklə dəstəkləməyə yönəldir.

Onlar deyirlər ki, Kim ölkəsinin Rusiya ilə mövcud əməkdaşlığını davam etdirə bilməyəcəyini hiss etdikdə Trampla diplomatiyanı bərpa etməyi düşünə bilər.

Kim və Tramp Şimali Koreyanın nüvə proqramının gələcəyini müzakirə etmək üçün 2018-ci ildən 2019-cu ilə qədər Trampın birinci prezidentlik dövründə üç dəfə görüşüblər.

ABŞ-ın Şimali Koreyaya qarşı iqtisadi sanksiyaları ilə bağlı mübahisələr fonunda onlar arasında yüksək səviyyəli diplomatiya nəticədə iflasa uğrayıb.