ABŞ Prezidenti Donald Trampın administrasiyası məlumatların keyfiyyətinə potensial təsir göstərən iqtisadi statistika hazırlamaq üçün hökumətlə əməkdaşlıq edən iki ekspert komitəsini buraxıb.

Ticarət naziri Hovard Latnik tərəfindən edilən bu ləğvetmə qərarı 28 fevral tarixindən qüvvəyə minib və çərşənbə axşamı, hökumətin inflyasiya, məşğulluq və ümumi daxili məhsul (ÜDM) göstəricilərində yardımçı olan Federal İqtisadi Statistika Məsləhət Komitəsinə (FESAC) elektron poçt vasitəsilə bildirilib.

Elektron məktubun bir hissəində yazılıb: “Ticarət naziri müəyyən edib ki, FESAC-ın yaradılma məqsədləri yerinə yetirilib və komitə 28 fevral 2025-ci il tarixindən etibarən ləğv edilib.” Digər qrup – ayrıca iqtisadi məlumatlarla məşğul olan İqtisadi Təhlil Bürosu Məsləhət Komitəsi də ləğv olunub.

"Bu, məlumatların keyfiyyətinə təsir edəcək, çünki federal statistika qurumlarının əsas prinsipi davamlı inkişaf və yenilik etməkdir," – deyə keçmiş FESAC üzvü Erika Qroşen "Reuters" agentliyinə bildirib. "Agentlikdən kənar ekspertlər arasında davamlı məlumat axını və məsləhətləşmə olmadan, bu proses onlar üçün daha çətin olacaq."

Ticarət Nazirliyi və Ağ Ev çərşənbə axşamı axşam saatlarına qədər şərh verməkdən imtina ediblər.

Bununla yanaşı, həm də Əmək Statistikaları Bürosunun (BLS) keçmiş komissarı olan Qroşen bildirib ki, FESAC akademiklərdən, özəl sektor iqtisadçılarından və məlumat alimlərindən ibarət idi və BLS ilə yanaşı, Ticarət Nazirliyinin Statistika qurumlarının – Siyahıyaalma Bürosu və İqtisadi Analiz Bürosunun – məlumatlarının davamlı təkmilləşdirilməsi üzərində çalışırdı.

Bu komitələr ən azı iyirmi il ərzində fəaliyyət göstərib.

Bu buraxılma qərarı, Latnikin hökumət xərclərini ÜDM hesabatından çıxaracağını elan etməsindən bir neçə gün sonra gəlib. Bəzi iqtisadçılar bu addımın mümkün olmadığını və texnologiya milyarderi İlon Maskın rəhbərlik etdiyi Dövlətin Səmərəliliyi Departamentinin (DOGE) həyata keçirdiyi sərt xərclər azaldılması və kütləvi ixtisarların iqtisadi təsirini gizlətməyə yönəldiyini bildiriblər.

"Müdafiə xərclərinin böyük hissəsi özəl podratçılara gedir. Belə olan halda, ÜDM-dən bunu necə çıxara bilərsiniz? Bu, absurd bir fikirdir", Boston Kollecinin iqtisadiyyat professoru Brayan Betun bildirib.