ABŞ-ın Sakit okean Komandanlığının rəhbəri admiral Harri Harris "Karl Vinson" təyyarədaşıyan gəmisinin olduğu yer haqqında ictimaiyyəti səhv məlumatlandırdığını etiraf edib.

Axar.az xəbər verir ki, ABŞ Nümayəndələr Palatasında dinləmələrdə iştirak edən H.Harris gəminin hazırda Şimali Koreyanın sahillərinə doğru istiqamət aldığını bildirib.

Qeyd edək ki, Pentaqon H.Harrisin əmrinə əsasən "Karl Vinson" gəmisinin 10 apreldə Koreyaya göndərildiyini bildirmişdi. Daha sonra isə “Karl Vinson”un əslində o istiqamətdə olmadığı, Yaponiya donanması ilə təlimlərdə iştirak etdiyi barədə xəbər yayıldı.

Bütün günahları üstünə götürən və informasiyanın yanlışlığını vaxtında xəbər edə bilməməsi ilə əlaqələndirən H.Harris artıq gəminin deyildiyi istiqamətdə üzdüyünü xatırladıb.