Bildiyiniz kimi, MN -nin 4 hərbçisi 10 milyon manatlıq mənimsəmədə ittiham olunur. Müdafiə Nazirliyinin mənimsəmədə təqsirləndirilən zabitləri Maliyyə İdarəsinin rəisi Rafael Xəlilov, N saylı hərbi hissənin maliyyə şöbəsinin rəisi Fəzail Əliyev, Quru Qoşunların maliyyə idarəsinin rəisi Bayram Bayramov və maliyyə idarəsinin zabiti Əlizadə Vüsal Ədalət oğlu barəsində istintaq orqanının təqdimatına baxılıb.
Daha sonra nazirliyin Maliyyə İdarəsinin şöbə rəisi, polkovnik Xələfov saxlanılıb. Səbail rayon Məhkəməsində onun barəsində 4 ay müddətinə həbs qətimkan tədbiri seçilib. Polkovnik Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə təqsirləndirilir. O, yarım milyon manatdan çox dövlət vəsaitini mənimsəməkdə şübhəli bilinir.
Məlumdur ki, nə 4 zabitin 10 milyon manat, nə də polkovnik Xələfovun yarım milyon manat mənimsəməsi 5 ayın, 10 ayın söhbəti deyil.... Korrupsiya əməlinin kökü uzun illərə dayanır. Bunu ilk açıq deyən həmkarım Səxavət Məmməd oldu, onu da 500 manat cərimələyib, cəzalandırdınız! "Yalandı, iftiradı" -dediniz!
İndi bu korrupsiya əməlini, həbsi nəinki bütün Azərbaycan , eləcədə Qafqaz ölkələri də bilir.
Ötən ilin aprelində millət vəkili Aqil Abbas MN-nə Silahlı Qüvvələrin Baş Klinik Hospitalının fəaliyyəti ilə bağlı yüngülvari bir irad bildirmişdi. Müdafiə Nazirliyi deputatı "Subyektiv və əsassız fikirlər"səsləndirdiyinə görə qınadı, onun dediyinin yanlış olduğunu isbat etməyə çalışdı.
Amma həmin "qınaqdan" cəmi 2 ay sonra yəni İyul ayında deputatın haqlı olduğu təsdiqləndi. Silahlı Qüvvələrin Baş Klinik Hospitalının bölmə rəisi Eyvazov Vüsal Qorxmaz oğlunun xidməti vəzifələrinin icrası zamanı həmin Hospitalın digər əməkdaşı Ağayev Hüseyn İlham oğlunun vasitəsilə çoxsaylı hərbi qulluqçuların hər birindən onlara dövlət tərəfindən birdəfəlik sosial sığorta müavinətinin ödənilməsi üçün Vətən müharibəsində aldıqları xəsarət dərəcələrinin təyin edilməsi müqabilində pul vəsaitlərini rüşvət qismində istəyərək almasına əsaslı şübhələr müəyyən edildi və adıgedən şəxslər həbs olundu.
Dövlətimizin bel sümüyü olan Müdafiə Nazirliyi! Əgər vaxtında əksinizin düşdüyü güzgüləri sındırmayıb, iddia edilən problemləri həll etsəydiniz, hazırda xirtdəyə qədər çamurun içində olan Ermənistan adıgedən həbslər haqqında öz mediasında ağlına gələni quraşdırmazdı.
P.S. Mən deyəndə ki, "yerdən kəsən varsa (haqsızlıq edən- red-Ə.R) göydən də baxan var! Baxır və nəyin necə olduğunu gözlər önünə sərir! Haqlı danışın, haqq olun ki. haqsız duruma düşməyin!
Əntiqə Rəşid
Teref.az