“Gürcüstan Prezidenti Mixail Kavelaşvilinin aprelin 15-16-da Azərbaycana ilk xarici səfəri Tbilisi-Bakı münasibətlərinin strateji əhəmiyyətini vurğulayaraq onu möhkəmləndirir”.

Bu sözləri Globalinfo.az-a açıqlamasında gürcü politoloq, Yaxın Şərq və Qafqaz Araşdırmaları İnstitutunun (IMECS) təsisçisi və baş direktoru Vasili Papava deyib.

O bildirib ki, səfər çərçivəsində Prezident İlham Əliyev, baş nazir Əli Əsədov və Milli Məclisin sədri Sahibə Qafarova ilə keçiriləcək görüşlər Tbilisinin Bakı ilə tərəfdaşlığı ən yüksək səviyyədə inkişaf etdirmək əzmini nümayiş etdirir:

“Gürcüstanın yeni liderinin səfər edəcəyi ilk ölkə kimi Azərbaycanın seçilməsi təsadüfi deyil. İki ölkə onilliklər ərzində siyasət, enerji, nəqliyyat və təhlükəsizlik kimi bir çox sahələrdə sıx əməkdaşlıq edir. Səfər Kavelaşviliyə öz administrasiyasının prioritetlərini müəyyənləşdirmək və Gürcüstanın Azərbaycanla strateji müttəfiqliyinə sadiqliyini bir daha təsdiqləmək imkanı verəcək”.

Cənubi Qafqaz elə bir regiondur ki, buradakı geosiyasi gərginlik bir çox prosesləri müəyyən edir. Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri və ya Bakı-Tbilisi-Qars dəmir yolu kimi birgə layihələr iki ölkənin dərin qarşılıqlı asılılığını nümayiş etdirir. Bu təşəbbüslər iqtisadi səmərəlilikdən əlavə, həm də Gürcüstan və Azərbaycanın beynəlxalq aləmdə mövqelərini möhkəmləndirir. Səfər iqtisadi inteqrasiyanın dərinləşdirilməsinə və regional münaqişələrlə bağlı risklərin azaldılmasına yönəlmiş yeni ideyaların müzakirəsi üçün platformaya çevrilə bilər ki, bu da mövcud qeyri-sabitlik şəraitində xüsusilə vacibdir”.

Papava qeyd edib ki, İlham Əliyevin bu yaxınlarda ADA Universitetində çıxışı zamanı Avropa Komissiyasının Gürcüstanın daxili işlərinə qarışmasını tənqid etməsi Tbilisidə böyük əks-səda doğurub:

“Azərbaycan Prezidentinin gürcü xalqının suverenliyinə hörmətlə yanaşması və Bakı tərəfdaşlığın gücləndirilməsinin zəruri olduğunu vurğulaması iki ölkənin xarici təzyiqlərə qarşı durmaqda ümumi mövqeyini əks etdirir. Kavelaşvilinin səfəri, çox güman ki, qlobal oyunçularla dialoqda praqmatik tarazlığı qorumaqla Tbilisi və Bakının bu çağırışlara yanaşmalarını sinxronlaşdırmağa kömək edəcək. Hər iki ölkə mürəkkəb beynəlxalq şəraitdə öz maraqlarını müdafiə etməyə çalışdıqları bir zamanda bu yanaşma xüsusilə vacibdir”.

Azərbaycana səfər, Gürcüstanın Bakıya təkcə iqtisadi tərəfdaş kimi deyil, həm də etibarlı münasibətlər qura biləcəyi siyasi müttəfiq kimi baxdığını vurğulayır. Gürcüstan və Azərbaycan Cənubi Qafqazın mühüm tranzit və enerji mərkəzi kimi formalaşmasında əsas rol oynayır, həmçinin xarici qüvvələrin regionun daxili siyasətinə təsir etmək cəhdləri fonunda onların əməkdaşlığı daha çox əhəmiyyət qazanır. Səfər Tbilisinin Azərbaycan kimi sübut olunmuş tərəfdaşlara arxalanaraq öz suverenliyini və müstəqilliyini möhkəmləndirmək istəyini təsdiqləyir. Prezident Əliyev də öz növbəsində dəfələrlə Gürcüstanla həmrəyliyi, xüsusən də daxili işlərə qarışmamaq məsələsinin vacib olduğunu vurğulayıb və bu prinsiplər çox güman ki, danışıqların əsasını təşkil edəcək”.

Politoloqun sözlərinə görə, Mixail Kavelaşvilinin Azərbaycana səfəri ölkələr arasında tərəfdaşlığın möhkəmləndirilməsində mühüm addım olacaq:

“Bu, Tbilisi və Bakının iqtisadi əməkdaşlığa və regional sabitliyi diqqət mərkəzində saxlamaqla çağırışlara birgə cavab vermək istəyini əks etdirir. Səfərin uğuru tərəflərin artan qlobal qeyri-müəyyənlik şəraitində qarşılıqlı fəaliyyət üçün konkret mexanizmlər hazırlamağı nə dərəcədə bacarmasından asılı olacaq. Tbilisi ilə Bakı arasında münasibətlərin tarixini nəzərə alsaq, bu, əldə edilə bilən məqsəddir. Danışıqlar Gürcüstan-Azərbaycan müttəfiqliyinin təməlinin möhkəmləndirilməsi ilə bağlı təhlükəsizlik, ticarət və ya infrastruktur sahələrində yeni sazişlər üçün zəmin yarada bilər”.