Ötən il Bakıda generalın evindən edilən oğurluqla bağlı qaranlıq məqamlar hələ də qalmaqdadır. Generalın evindən yoxa çıxan, anasına məxsus olduğu deyilən qızılların kim tərəfindən oğurlanması hələ də sübuta yetirilməyib.

İlkin araşdırma zamanı mənzildə işləyən qulluqçu şübhəli şəxs qismində həbs edilsə də 4 ay sonra onu ev dustaqlığına buraxıblar. Səbəb isə onun oğurluq əməlini sübut edən faktların olmaması olub.

Söhbət Dövlət Gömrük Komitəsinin generalı Qambay Əliyevin anası Böyükxanım Əkbərovanın adına olan İzzət Həmidov küçəsi ev 7, mənzil 8-dən edilən oğurluqdan gedir.
Bu oğurluq hadisəsi ölkə gündəmində kifayət qədər səs-küy yaratmışdı. Mənzildən ümumi dəyəri 160 min manata yaxın qızıl-ziynət və nağd pul oğurlandığı qeyd edilir.

Qullquçu həbs edildi, amma...

Ötən il baş verən oğurluq hadisəsində ilk şübhəli şəxs kimi evdə qulluqçu işləyən Sədaqət Məmmədova saxlanıldı. Hadisədən bir həftə sonra onun barəsində Cinayət Məcəlləsinin 177-ci (oğurluq) maddəsi ilə cinayət işi açıldı. S.Məmmədova barəsində 4 ay müddətinə həbs qətimkan tədbiri seçildi.

S.Məmmədovanın oğurluq əməlini törətməsini sübut edən faktlar olmadığından onun barəsində həbs qətimkan tədbiri dəyişdirilib və o, ev dustaqlığına buraxıldı.

Hazırda Sədaqət Məmmədovanın cinayət işi üzrə məhkəmə prosesi Bakı Ağır Cinayətlər Məhkəməsində davam etdirilir. Hakim Rahib Salmanovun sədrliyi ilə keçirilən məhkəmə prosesində şahidlər dindirilirb.

Musavat.com-un məhkəmə prosesində iştirak edən müxbiri xəbər verir ki, şahid qismində ilk olaraq generalın qızının həyat yoldaşı Ramin Qədirov olub.

Generalın kürəkəninin ifadəsi

Ramin Qədirov oğurluq hadisəsindən qeyd edilən mənzilə gələrkən xəbər tutduğunu deyib: “Oğlumla gəzintiyə çıxmışdıq. Sonra yoldaşımı götürmək üçün evə gəldik. Onda polisləri gördüm və hadisədən xəbər tutdum”.

Təqsirləndirilən S.Məmmədovanı evdə işləyən qulluqçulardan biri kimi tanıdığını deyən R.Qədimov onunla heç bir əlqəsinin, danışığının olmadığını söyləyib.

O, əlavə edib ki, mənzildən oğurlanan qızıllar arasında həyat yoldaşının da qızıl-ziynət əşyaları olub.

1 ay ərzində evdə aparılan təmir işlərinə nəzarət etdiyini deyən R.Qədirov evdə kamera sisteminin olmasından xəbərsiz olduğunu da bildirib.

Mhəkəmə prosesində şahid qismində təqsirləndirilən S.Məmmədovanın yaxın rəfiqəsi Dostuxanım Yunusova da dindirilib.

İfadə verərkən həyəcanlı olan şahid Sədaqət Məmmədova ilə bir kənddən olduqlarını, Kürdəmirdən Bakıya gələrkən də mütləq görüşdüklərini deyib.

“İvan, Petrov yazmışam. Sənə nə var?”

Onun bu hadisə ilə bağlılığına gəlincə. Məhkəmədə ifadə verən şahid bildiklərini belə danşıb: “Mən Sədaqətlə çox yaxınam. Sirrimiz, söhbətimiz, yediyimiz çörək bir olub. Bakıya gələndə də görüşürük. Bir gün Sədaqət zəng elədi ki, Bakıya gələndə onunla görüşüm. Qardaşına pul, bir də sənəd göndərəcəkdi. Bakıya gələndə gedib Sədaqətlə görüşdüm. Mən rayona qayıdanda “28 may”da görüşəndə mənə 1000 manat verdi. Dedi ki, rayonda olan qardaşının arvadı Gülbənizə verim. Göy paketdə də nəsə vardı.

Dedi ki, sənəddir. Saxlayım, gəlib məndən götürəcək. Sonra cibindən iki kağız çıxardı. Deyəsən birində olanı digərinə köçürdü. Verdi və saxlamağımı istədi. Dedi ki, o deyəndə aparıb özünə verəcəm. Əlavə olaraq mənə 500 manat verdi. Lazım olsa, banka olan borcumu ödəməyimi istədi. Kağıza nə yazdığını soruşdum. Çünki onun yazdığı əlifbanı başa düşmürdüm. Dedi ki, “İvan, Petrov yazmışam. Sənə nə var? Başa düşürsən ki?”. Mən də heç nə demədim. Pulu da sənədi də alıb, getdim rayona”.

D.Yunusova deyib ki, rayona qayıdıb 1000 manatı Sədaqətin qardaşı arvadına verib. Sənədləri isə özündə saxlayıb. Bir neçə gün sonra Sədaqət rayona gələrək sənədləri ondan istəyib: “Sədaqət öz yazdığı kağızı işlədiyi evə aparmağımı istədi. Mən də aparıb qapını döydüm. Evin qapısını elə Sədaqət özü açdı. Verib qayıtdım. Bir neçə gün sonra Sədaəqət rayona gəldi. Sənədləri qaytarmağımı istədi. Sənədləri verdim, sonradan həmin sənədlərin yandırılmasından xəbər tutudum. Bu hadisədən də bir neçə gün sonra qabyuyan işlədiyim kafeyə polislər gəldi. Mənə dedilər ki, sənədlərin və qızılların yerini deyim. And aman elədim ki, heçnədən xəbərim yoxdur. Olanları bu şəkildə də danışdım”.

Şahid Sədaqət Məmmədovanın ona verdiyi 500 manatı da xərcləmədiyini və geri qaytardığını söyləyib.

Məhkəmədə dövlət ittihamçısı Sədaqət Məmmədovanın və Dostuxanım Yunusovanın çarpaz dindirilməsini istəyib.

Prokuror S.Məmmədovadan rəfiqəsinə verdiyi kağıza nə yazdığını soruşub.

Generalın qızına təhdid məktubu

S.Məmmədova həmin məktubu generalın kürəkəni Raminin istəyi ilə yazdığını etiraf edib: “Ramin dedi ki, sənə dəxli yoxdur. Nə deyirəmsə elə. Mənə də bunun üçün 1800 manat pul verdi. Ramin mən işləyən evdə arvadının adına mənzil alınması ilə bağlı sənədlər tapmışdı. Bunu mənə deyəndə bildirdi ki, bu işə görə arvadından və arvadının nənəsi Böyükxanımdan qisas alacaq. Mənə ev sənədlərini saxlamağa verdi. Bir də kağız verid. Həmin kağıza yadığıqlarını öz xəttimlə köçürüb Böyükxanıma verməyimi istədi. Mənim də pula ehtiyacım var idi. Buna görə də etdim. Amma vallah oğurluqla heç bir əlaqəm yoxdur. Bunların hamısı Raminin qurduğu oyunlardır”.

Prokuror məktubun mətnini açıqlamayıb. Ancaq prokuror məktubun təhdid etmək məqsədi ilə yazıldığını qeyd edib. Məlum olub ki, həmin məktubda generalın qızları hədə-qorxu ilə şantaj edilib. Generalın kürəkəni isə həmin məktubdan xəbərsiz olduğunu deyir.
Məhkəmədə bir daha hadisə baş verən gün yaşananlara qayıdan Sədaqət Məmmədova bunları danışıb: “Mən 1 il idi ki, generalın evində işləyirdim. Anası Böyükxanım xanıma baxırdım. Yaşlı qadın idi. Gecələr də ona mən baxırdım. Əvvəl generalın idarəsində işləmişəm. Məni etibarlı adam bilib ora gətirdilər. Hadisənin baş verdiyi gün səhər saatlarında generalın qızı Sevinc zəng edib dedi ki, nənəsi ilə özü qalacaq. Buna görə də mənin getməyimi istəmədi. Belə də oldu. Amma axşam saat 11 radələrində zəng edib məni evə çağırdılar. Çatanda bildim ki, oğurluq olub. Polislər də evdə idilər. Mən Raminə dedim ki, bu oğurluğun mənə verdiyin sənədlərə dəxli var? Yanında olan oğlunun canına and içdi ki, yoxdur. Mənə dedi ki, istəyirsənsə, sənədləri at getsin, ya da yandır. Bundan sonra mən o, sənədləri yandırmışam”.

Hakim Rahib Salmanov təqsirləndirilən şəxsdən özünün günahsız olmasını necə sübut edə biləcəyini və oğurluq hadisəsində kimi günahkar bildiyini soruşub.

“Generalın kürəkəni və qızından şübhələnirəm”

S.Məmmədovanın cavabı isə belə olub: “Mən bu işdə generalın kürəkəni Ramindən və qızından şübhələnirəm. Axı necə oldu ki, bircə gün mən getmədim və həmin gün də oğurluq hadisəsi oldu? Axşam Sevinc zəng edib çağırdı. Əvvəl dedilər ki, 300 minlik qızıl oğurlanıb. Sonra 150 min oldu.

Sevinc əvvəlcə deyirdi ki, oğurlanan çamadana sırğasını qoymaq istəyəndə bilib ki, çamadan oğurlanıb. Sonra məhkəmədə dedi ki, başqa bir əşyasını qoymaq istəyib. Mənim yeganə günahım Raminin verdiyi sənədləri götürməyimdir”.

Məhkəmədə şahid qismində S.Məmmədovanın qardaşı arvadı Gülbəniz Məmmədova da ifadə verib. O, ifadəsində Sədaqət Məmmədovanın rayona göndərdiyi sənədləri yandırdığını, lakin içində nə yazıldığını bilmədiyini söyləyib.

“Dostuxanım gətirib 1000 manatı mənə verdi. Sədaqətlə telefonda danışdıq. Mən xəstə qayınanamla rayonda yaşayıram. Sədaqət dedi ki, 100 mantını anası və özüm üçün xərcləyim. Qalan 900 manatı gəlib götürəcək. Sonra Sədaqət mənə sənədlər verdi. Onları yandırmağımı istədi. Mən də nə olduğunu heç soruşmadım. Həyətdə zibilləri yandıranda kağızları da oda atdım. Nə ondan əvvəl, nədə sonra olanlardan xəbərim var. Mənə verilən 900 manatı da Sədaqətə qaytardım”.

Generalın adı gizlədilir

Musavat.com-un məlumatına görə, işdə adı çəkilən generalın anası Böyükxanım Əhmədova bir neçə ay əvvəl dünyasını dəyişib. Genral mərhum anası ilə eyni evdə yaşayırmış.

S.Məmmədova həbsdən azad edildikdən sonra mətbuata açıqlamasında deyib ki, generalın adını bu işdə hallandırmamağa çalışırlar. Onun iddiasına görə, oğurlanan qızıllar generalın olsa da anasının adı çəkilir.

S.Məmmədova generalın qızı tərəfindən rüşvət təklifi aldığını və həmçinin hədələndiyini də bildirib: “Kürdəxanıda saxlanılanda Sevinc gəlib dedi ki, 150 min verəcəm, amma ərimin adını çəkmə. Sonra generalın adamı Rauf Mehiyev mənə işi boynuma almağımı təklif elədi. Həmin müddətdə mən də ailə üzvlərim də hədələndik”.