Ailə, Qadın və Uşaq Problemləri üzrə Dövlət Komitəsinın ləğvi planlaşdırılır. Komitənin ləğvi ölkədə həyata keçirlən struktur islahatının tərkib hissə kimi nəzərdə tutulub. Bu barədə istiqlal.az-a hakimiyyətdəki mənbələrdən xəbər daxil olub.

Mənbənin məlumatına görə, komitənin funksiyaları Səhiyyə Nazirliyi ilə Əmək və Əhalinin Sosial Müdafiəsi Nazirliyi arasında bölüşdürüləcək.

Ailə, Qadın və Uşaq Problemləri üzrə Dövlət Komitəsi Azərbaycan prezidentinin 6 fevral 2006-cı il fərmanı ilə yaradılıb. Komitənin sədri Hicran Hüseynovadır.

Hicran Hüseyonovanın adı 170 min dollarlıq rüşvət qalmaqalında da hallanır. İddialara görə, 170 min ABŞ dolları komitənin keçmiş aparat rəhbəri Səfər İmanovun vasitəsi ilə Hicran Hüseynovaya verilib. Rüşvət icra başçısının müavini təyinatına görə verilib. İcra başçısının müavini olmaq üçün 170 min dolları verən şəxs isə Qubadlı rayon sakinidir, keçmiş biznesmendir və 45 yaşındadır. Hazırda bu məsələ Baş prokuror yanında Korrupsiyaya qarşı Mübarizə Baş İdarəsində araşdırılır.

Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin müdiri Elgün Səfərov bildirib ki, S.İmanovun 170 min dollar pul alması iddiası ilə bağlı rüşvət verən şəxsin vəkili Adəm Məmmədov komitədə olub. A.Məmmədovla söhbətdən sonra vəkilin iddia etdiyi faktın araşdırılması üçün bu il fevral ayının 7-də Dövlət Komitəsi rəsmi şəkildə Baş Prokuroru yanında Korrupsiyaya Qarşı Mübarizə Baş İdarəsinə müraciət edilib.”Müraciət edilib ki, məsələ araşdırılsın, ehtiyac varsa müvafiq tədbir görülsün. Biz hələ də baş idarədən cavab gözləyirik. Məsələ hələ təsdiqini tapmayıb, həmçinin təkzib edilməyib.”

Hicran Hüseyonova

Hüseynova Hicran Kamran qızı 13 avqust 1955-ci ildə Moskva şəhərində anadan olmuşdur. 1972-ci ildə 6 nömrəli orta məktəbi, 1977-ci ildə isə Bakı Dövlət Universitetinin tarix fakültəsini bitirmişdir.

1977-ci ildən 189 saylı orta məktəbdə müəllim fəaliyyətinə başlamış, paralel olaraq Bakı Dövlət Universitetində siyasi tarix fənnini tədris etmişdir.

1988-1993-cü illər ərzində Bakı Dövlət Universitetinin siyasi tarix kafedrasında müəllim, baş müəllim və kafedra dosenti vəzifəsində işləmişdir.

1999-cu ildən 2003-cü ilədək Azərbaycan Respublikası Qadın Problemləri üzrə Dövlət Komitəsində “Beynəlxalq münasibətlər və informasiya” şöbəsinin müdiri işləmişdir.

2000-2006-cı illərdə Bakı Dövlət Universitetində Beynəlxalq hüquq və Beynəlxalq münasibətlər fakültəsinin dekan müavini olmuşdur.

Gender problemləri üzrə Avropa Şurasının və ATƏT-in ekspertidir. Azərbaycanda “Beynəlxalq məsələlərin tədqiqatı assosiasiyası”nın prezidentidir.

Azərbaycan prezidentinin 7 fevral 2006-ci il tarixli Sərəncamı ilə Ailə, Qadın və Uşaq Problemləri üzrə Dövlət Komitəsinin sədri vəzifəsinə təyin edilmişdir.

İstiqlal.az xatırladır ki, struktur islahatları çərçivəsində son 1 ildə 3 mərkəzi icra hakimiyyəti orqanı - Dövlət Torpaq və Xəritəçəkmə Komitəsi, Satınalmalar üzrə Dövlət Agentliyi və Qiymətli Kağızlar üzrə Dövlət Komitəsi ləğv edilib. Prezident İlham Əliyev 2016-cı ildə struktur və idarəetmə islahatlarının davam edəcəyini bəyan edib.