Yapon dənizində batan "Vostok" balıqçı gəmisinin axtarışları tamamilə dayandırılıb.



APA-nın verdiyi xəbərə görə, bu barədə RİA Novosti agentliyinə “Vladivostok” dəniz xilasedici mərkəzinin nümayəndəsi bildirib.



“Axtarış-xilasedici əməliyyatın fəal fazası sona çatdıqdan sonra axtarış ərazidən keçən gəmilər tərəfindən aparılıb. Lakin 9 sutka ərzində aparılan axtarışlar nəticəsiz qalıb. Beləliklə, "Vostok" balıqçı gəmisinin axtarışları tamamilə dayandırılıb”, deyə nümayəndə bildirib.



Qeyd edək ki, “Vostok” balıqçı gəmisi yanvarın 25-də Primorsk diyarı sahillərində, Yapon dənizində yoxa çıxıb. Gəmidə Rusiya vətəndaşı olan iki azərbaycanlı – 1972-ci il təvəllüdlü Mübariz Hüseynov və 1991-ci il təvəllüdlü Ruslan Əlizadə olub.