"Neftçi" "Keşlə"yə qalib gəlib
8-03-2021, 22:07
"Sabah" yenə xal itirib
Azərbaycan Premyer Liqasında XIX tura start verilib. AYNA-nın Apasport.az saytına istinadən məlumatına görə, bu gün turun ilk iki oyunu keçirilib.
Hər iki görüş Bakıda baş tutub. Əvvəlcə autsayder “Sabah” meydana çıxıb. 2021-ci ildə qələbə üzünə həsrət olan paytaxt təmsilçisi bu tilsimi “Sumqayıt”la matçda da qıra bilməyib. Komandalar hərəyə 1 qolla aktivlərinə 1 xal yazdırıblar. Visente Qomesin yetirmələri 6-cı sınağında 3-cü heç-heçəsini edib. Bundan əvvəlki üç matçda qalib gələ bilmədiyi üçün 4-cü pillədəki mövqeyini təhlükə altına atan “kimyaçılar” isə yenə 1 xala sevinməli olublar.
Lider “Neftçi” paytaxt derbisində “Keşlə”ni sınağa çəkib. Sənan Qurbanovun baş məşqçi postuna təyinatının ardından son 3 oyunda rəqibləri ilə sülh bağlayan “Keşlə” flaqmana eyni aqibəti yaşada bilməyib. Rəqibini 3 qolla üstələyən Samir Abasovun yetirmələri liderliyini davam etdirib. Qəsəbə təmsilçisinin gücü yalnız təsəlli topuna çatıb. Bu matçda dubla imza atmaqla qollarının sayını 13-ə çatdıran Namiq Ələsgərov bombardirlər yarışında Mahir Emrelini geridə qoyaraq, liderliyi ələ keçirib.
Qeyd edək ki, tura sabah keçiriləcək iki oyunla yekun vurulacaq. “Qəbələ” “Səbail”i (15:00), “Zirə” isə “Qarabağ”ı (17:15) qəbul edəcək.
