Çempionlar Liqası: Mahir Emrelinin komandası Estoniyada cavab görüşünə çıxır
27-07-2021, 08:05
Bu gün UEFA Çempionlar Liqasında II təsnifat mərhələsinin cavab qarşılaşmalarına start veriləcək.
"Report"un məlumatına görə, ilk oyun günündə 4 matç keçiriləcək.
Azərbaycan millisinin üzvü Mahir Emrelinin çıxış etdiyi Polşa "Legiya"sı Estoniyada “Flora”nın qonağı olacaq. İlk matçda Varşava təmsilçisi qələbə qazanıb - 2:1.
HİK Finlandiyada İsveçin "Malmö" komandasını sınağa çəkəcək. Helsinki klubu səfərdə rəqibinə 1:2 hesabı ilə uduzub. Məğlub komanda Avropa Liqasının III təsnifat mərhələsində "Neftçi" (Azərbaycan) - "Olimpiakos" (Yunanıstan) cütünün uduzan tərəfi ilə görüşəcək.
Günün digər iki oyununda "Omoniya" Kiprdə Xorvatiyanın "Dinamo" (Zaqreb) klubunu, "Jalgiris" isə Litvada Macarıstan "Ferentsvaroş"unu qəbul edəcək.