AVRO-2024: İspaniya-İngiltərə duelinin qalibi hansı komanda olacaq?
13-07-2024, 18:04
![AVRO-2024: İspaniya-İngiltərə duelinin qalibi hansı komanda olacaq?](/uploads/posts/2024-07/1720848679_1.jpg)
İspaniya hələ kuboku qazana bilməyən İngiltərə ilə finalda dördüncü dəfə Avropa çempionu adını qazanmağa çalışacaq. AVRO-2024-ün həlledici oyunu bazar günü Berlindəki "Olimpiastadion"da baş tutacaq.
Oxu.Az xatırladır ki, İspaniya millisi Avropa çempionatının üç qalibiyyət rekordunu Almaniya ilə bölüşür və 2008-ci ildən bəri dördüncü dəfə turniri qazanmağa çalışacaq. İngiltərə ardıcıl ikinci dəfə finala yüksəlib. Sonuncu dəfə öz evində - "Uembli" stadionunda İtaliyaya penaltilər seriyasında məğlub olan İngiltərə seçməsi bu dəfə kuboku muzeyinə aparmaq niyyətindədir.
Hər iki komanda yarımfinalda 2:1 hesabı ilə qələbə qazanıb. İspaniya iyulun 9-da Münhendə Fransanı Lamin Yamal və Dani Olmonun dəqiq zərbələri sayəsində məğlub etdi. Ertəsi gün Harri Keyn birinci hissədə penaltini vurdu və əsas vaxtın ilk dəqiqəsində Olli Uotkinsin qolu İngiltərəyə Dortmundda Niderland üzərində qələbə qazandırdı.
Komandalar indiyədək ümumilikdə 27 dəfə qarşılaşıblar. Bunlardan 13-də İngiltərə seçməsi, 10-da isə İspaniya millisi qələbəyə sevinib. Dörd dəfə isə heç-heçə qeydə alınıb. İngiltərə İspaniyanın qapısına 45, İspaniya isə İngiltərənin qapısına 32 qol vurmağı bacarıb.
Komandalar sonuncu dəfə UEFA Millətlər Liqasında 2018/19 mövsümündə üz-üzə gəliblər. 8 sentyabr 2018-ci ildə "Uembli"də Markus Reşford 11-ci dəqiqədə İngiltərəni önə keçirib, lakin Saul Niquez iki dəqiqə sonra hesabı bərabərləşdirib. Daha sonra səhnəyə çıxan Rodriqo 32-ci dəqiqədə İspaniyanın qalibiyyət qolunu vurub. İngiltərə İspaniyaya qarşı keçirdiyi ilk 13 matçın 9-da qalib gəlib, üçündə isə uduzub, lakin son 14 görüşdə yalnız 4 qələbə qazanıb.
İspaniya millisinin AVRO-2024-dəki tarixi nəticələrinə nəzər yetirək.
İspaniya ardıcıl altı dəfə penalti zərbəsi olmadan Avropa çempionatında qalib gələn ilk komandadır. Yarımfinalda Fransa ilə qarşılaşmada qol vuran Lamin Yamal 16 yaş 362 günlük Avropa çempionatları tarixində ən gənc qol vuran futbolçu oldu. O, həmçinin 1958-ci il dünya çempionatında 17 yaş 244 günlük Pelenin rekordunu qıraraq, Avropa və ya dünya çempionatının yarımfinalında oynayan ən gənc futbolçu oldu. Fransızlarla matçda meydana çıxan Xesus Navas (38 yaş 231 gün) Avropa və dünya çempionatının final mərhələsinin ən yaşlı oyunçusu oldu. Eyni yarımfinalda Olmo ardıcıl üç Avropa çempionatı matçında qol vuran ilk ispan futbolçu oldu. Bu, İspaniya üçün 12-ci Avropa çempionatının final görüşüdür. Turnirin daha çox final mərhələsində Almaniya (14) iştirak edib.
Fransaya qalib gələn ispanlar ardıcıl səkkizinci qələbəsini qazanıblar. Son 18 oyunda komanda cəmi bir məğlubiyyətlə üzləşib. İspaniya seçməsi yalnız martın 22-də Kolumbiya ilə yoldaşlıq görüşündə məğlub olub - 0:1.
İspaniya 11 dəfə Avropa çempionatının finalına çıxıb, 8 dəfə isə pley-off mərhələsinə yüksəlib. Bura son beş Avropa çempionatı da daxildir.
Tarixində ilk dəfə Avropa çempionu olmaq istəyən İngiltərə seçməsi üçün də AVRO-2024 tarixi nəticələrlə yadda qalıb.
Belə ki, Keyn AVRO-2024-ün pley-off mərhələsində 6 qol vuraraq Antuan Qrizmannın rekordunu qırıb. İngiltərə millisinin baş məşqçisi Qaret Sautqeyt Avropa çempionatlarında də 13 matçda məğlub olmayıb. Bu isə menecerlər üçün rekord göstəricidir.
İngiltərə tarixində AVRO-2020 ən uğurlu Avropa çempionatı olub.
Sautqeyt 2016-cı ildən İngiltərə millisini çalışdırır. İngilislər AVRO-2024-ün seçmə mərhələsində bir dəfə də olsun məğlubiyyətlə üzləşməyib, səkkiz matçda altı qələbə qazanıb. AVRO-2016-nın 1/8 finalında İslandiyaya 1:2 hesablı məğlubiyyətdən bəri İngiltərənin Avropa çempionatlarındakı məğlubiyyətsizlik seriyası 13 matçdır.
İngiltərənin bu turnirdə yeddi qolundan beşini Keyn və ikisini isə Bellinqhem vurub. 1/8 finalda Slovakiya ilə qarşılaşma Keynin İngiltərə üçün 79-cu turnir oyunu olub. Bu, əvvəllər Peter Şiltona (78) məxsus olan yeni milli rekorddur.
İspaniya millisi İngiltərə ilə görüşdə meydana itkilərlə çıxa bilər. Alvaro Morata və Pedri zədə üzündən bu görüşü buraxa bilər. İngiltərə seçməsi isə görüşə itkisiz çıxacaq.
İyul ayının 14-də keçiriləcək final görüşü Bakı vaxtı ilə saat 23:00-da start götürəcək.
Qarşılaşmanı fransalı hakimlər briqadasından Fransua Leteksiye idarə edəcək.
14 iyul
Final
İspaniya - İngiltərə
Saat 23:00, "Olympiastadion" (Berlin)