Moderator.az Ukrayna KİV-nə istinadən xəbər verir ki, Rusiyadan Ukraynaya sərhəd-keçid məntəqəsində kişi arvadının meyitini canlı sərnişin kimi təqdim etməyə çalışıb.

Məlumata görə insident Xarkov vilayətinin “ Qoptovka” buraxılış məntəqəsində baş verib. Rusiya dövlət qeydiyyat nömrəli Ford avtomobili Ukraynaya keçmək istəyib. Sükan arxasında Rusiya vətəndaşı kişi olub, öndəki sərnişin yerində isə Ukrayna vətəndaşı olan oğlu əyləşib. Avtomobilə baxış zamanı arxa oturacaqda canlı adam kimi təhlükəsizlik kəməri ilə bağlanmış qadın meyiti aşkar olunub.

Sonra məlum olub ki, qadın sürücünün arvadıdır. O sərhədçilərə ölüm şəhadətnaməsi təqdim edib və bildirib ki, oğlunun xahişi ilə anasını Ukraynanın Zaporojye şəhərində dəfn etmək istəyirlər. Qəribədir ki, Rusiya sərhədçiləri buraxılış məntəqəsində meyiti “görməyiblər”. Ukrayna sərhədçiləri meyitin Ukrayna ərazisinə keçirilməsində heç bir problem olmadığını deyib avtomobili ölkəyə buraxıblar.