Rusiyanın Kostroma vilayətinin Povalixinsk kəndinin rəhbəri vəzifəsinə seçilmiş süpürgəçi Marina Udqodskaya öz səlahiyyətlərinin icrasını dayandırıb.

Bu barədə "Report" Rusiya mətbuatına istinadən xəbər verir.

Bildirilir ki, Marina Udqodskaya qəsəbəni idarə edə bilmədiyini anlayıb.

Deputatlar Şurası onun istefasına səs veriblər. Marina Udqodskaya vəzifəsini noyabrın 19-da tərk edəcək.

Udqodskaya Çuxlomskdakı sənaye texnikumunu bitirib. Onun iş yeri haqqında məlumatda qeyd edilib ki, Marina həmin kəndin administrasiyasında xidməti binanın süpürgəçisidir.

Xatırladaq ki, Udgodskaya (Sosial Ədalət uğrunda Təqaüdçülər Partiyasından namizəd) gözlənilmədən yerli orqanlara seçkilərdə Çuxlomsk rayonunun Povalixinsk kəndinin hazırkı rəhbəri Nikolay Loktevə 61,7% səslə qalib gəlib. Seçkilərdə süpürgəçiyə 87 nəfər, Loktevə 48 nəfər səs verib.