“Vətən müharibəsində iştirak edən qazilərimiz bilməlidir ki, dövlət onların qayğısına qalır. Həmin o yaralılar, qazilər sənəd almaq üçün dəfələrlə gedib-gəlməli deyillər”.

Bizim.Media xəbər verir ki, bunu Milli Məclisin bu gün keçirilən iclasında deputat Nigar Arpadarai deyib.

Onun sözlərinə görə, ASAN Xidmət kimi bir mexanizm qurula bilər:

“Bizim kifayət qədər könüllülərimiz var. Bu sənədləri könüllülər vasitəsilə də qazilərin evlərinə göndərmək olar”.

Qeyd edək ki, Milli Məclisin növbəti plenar iclası bu gün öz işinə başlayıb. İclasda 22 məsələ müzakirə ediləcək.