Kanadanın Ontario şəhərində kiçik təyyarənin qəzaya uğraması nəticəsində 4 nəfərlik ekipaj həlak olub. SİA xəbər verir ki, bu barədə dünən “CTV” kanalı məlumat yayıb.

Qeyd olunur ki, faciə şənbə günü, aprelin 30-da vilayətin şimal-qərbində, yaşayış məntəqələrindən xeyli uzaqda baş verib.

Ölkənin Kral Hərbi Hava Qüvvələrinin ictimaiyyətlə əlaqələr üzrə əməkdaşı bildirib ki, xilasedicilər təyyarəni üzərində quraşdırılmış transponderdən istifadə edərək aşkar ediblər. Axtarışlara Ontario hökumətinin helikopterinin və Mülki Hava Axtarış və Xilasetmə Dərnəyinin bir qrupunun cəlb edildiyi bildirilir.

Ölkənin Nəqliyyatın Təhlükəsizliyi Şurası qəzanın səbəblərini araşdırır. Verilən məlumata görə, hazırda müstəntiqlər hadisə yerindədir.