Suriya üzrə danışıqların altıncı raunduna mayın 16-da start veriləcək.

APA-nın xəbərinə görə, bu barədə BMT-nin xüsusi elçisinin ofisindən bildiriblər.

“Suriya üzrə danışıqların altıncı raunduna mayın 16-da, Cenevrədə start veriləcək”, məlumatda deyilir.

Məlumata əsasən, BMT-nin Suriya üzrə xüsusi elçisi Staffan de Mistura mayın 4-də Astanada əldə edilən razılaşmanın yerinə yetiriləcəyinə ümid etdiyini bildirib.

Mayın 5-də Suriyada dörd deeskalasiya zonasının yaradılması barədə memorandum imzalanıb. Bir gün sonra deeskalasiya zonalarında atəşkəs rejimi qüvvəyə minib. Sənəd münaqişə tərəfləri və atəşkəs razılığının zəmanətçiləri olan ölkələrin nümayəndə heyətləri (Türkiyə, Rusiya, İran) tərəfindən imzalanıb.

Xatırladaq ki, Suriya hökuməti və müxalifət nümayəndələrinin iştirakı danışıqların beşinci raundu martın 29-31-də keçirilib, siyasi nizamlanma prosesində müsbət irəliləyiş əldə olunmayıb.