Suriyada fəaliyyət göstərən “İraq İslam Müqaviməti” şiə hərəkatının silahlı birləşmələri ABŞ-ın Həsəkə əyalətindəki Əş-Şəddadidəki hərbi bazasına raket zərbələri endirib.

Bakupost.az xəbər verir ki, bu barədə “Al Mayadeen” telekanalı məlumat yayıb.

Telekanalın məlumatına görə, El-Cəbbis neft yatağının yaxınlığında yerləşən hərbi obyektə raket sistemlərindən atəş açılıb. Tələfat və maddi ziyan barədə hələlik məlumat yoxdur.

Bundan əlavə, ABŞ-ın Əl-Qamışlı (Dəməşqdən 700 km məsafədə) şəhəri yaxınlığında Hemo və Əl-Malikiyyədəki hərbi bazaları raket hücuma məruz qalıb, telekanal qeyd edir.

İraqda hava hücumundan müdafiə qüvvələri şiə yaraqlılarının Ərbil inzibati mərkəzində (Bağdaddan 425 km aralıda) beynəlxalq hava limanı ərazisində ABŞ hərbi bazasına hücum etmək üçün istifadə etdiyi kamikadze pilotsuz təyyarəni vurub.