Ermənistanın baş naziri Nikol Paşinyan keçmiş müdafiə naziri Arşak Karapetyanla yazışmalarını sosial mediada dərc edib.

Redaktor.az xəbər verir ki, Paşinyan dünən keçirdiyi mətbuat konfransında Karapetyanın Azərbaycan qoşunlarının Ermənistan istiqamətində hərəkəti haqda ona məlumat vermədiyini açıqlayıb.

“Arşak Karapetyan ən qısa müddətdə xidmət edən müdafiə naziridir. 2021-ci ilin may hadisələrində o, Baş Qərargah rəisinin birinci müavini, noyabr hadisələrində isə müdafiə naziri idi. Mən onu işdən çıxarmaq qərarına gəldim. 2021-ci ilin 14 noyabrında səhər saatlarında o bildirdi ki, sərhəddə sakitlikdir, halbuki o, bu məlumatı verən zaman Azərbaycan qoşunları hərəkətə keçmiş, bir sıra mövqeləri tutmuşdu. Ya məlumatı yox idi, ya da məlumat vermədi”, - Paşinyan bildirib.

Karapetyan Paşinyanın iddialarını rədd edib, bunun yalan olduğunu deyib. Qeyd edib ki, həmin gün o, Dubayda olub.

“Orada mühüm görüş nəzərdə tutulmuşdu, həmin görüşə getdim. Ermənistanın silah alması, bəzi silah növlərinin idxalı ilə bağlı problemlərimiz var idi. Söhbət hücum dronlarından gedir. Vəziyyəti bildirməyə fiziki imkanım yox idi. Həmin məruzəni müdafiə nazirinin yerində qalan, nazir funksiyasını yerinə yetirən etməli idi”, - o bildirib.

Bu cavabdan sonra Paşinyan Karapetyanla yazışmalarını sosial şəbəkələrdə dərc edib.

Erməni baş nazirin “Arşak Karapetyanın yalanının ifşası” sözləri ilə paylaşdığı yazışma 2021-ci ilin 14 noyabr tarixinə aiddir. Karapetyan səhər saat 09:38-də Paşinyana səsli mesaj göndərib:

- Cənab baş nazir, sizə can sağlığı arzulayıram. Bizdə hər şey normaldır.

Paşinyan saat 16:12-də Karapetyana yazır:

- Haradasan?

Saat 16:39-də əlavə edir:

- Məsuliyyətsiz iş ortaya çıxdı.

Saat 18:26-da yazır:

- Ciddi söhbətimiz olacaq.

Saat 18:58-də qeyd edir:

- Baş verənlərlə bağlı ictimaiyyətə açıqlama verməlisiniz.

Karapetyan Paşinyanın mesajlarına cavab verməyib.

Qeyd edək ki, sözügedən hadisədən bir gün sonra - 2021-ci il noyabrın 15-i Ermənistanın o dövrdəki Prezidenti Armen Sarkisyan Nikol Paşinyanın təklifi əsasında A.Karapetyanı vəzifəsindən azad edib.

O, 2021-ci il avqustun 3-ü həmin vəzifəyə təyin edilib.

Xatırladaq ki, 2021-ci ilin noyabrın 16-da dövlət sərhədində Ermənistanın təxribatları nəticəsində baş verən döyüş əməliyyatları zamanı Azərbaycan Ordusu yeddi şəhid verib.

Döyüşlərdə 10 nəfər hərbi qulluqçumuz yaralanıb.