Payız-qış mövsümündə vətəndaşlara ən çox sıxıntı yaşadan kommunal xidmət qurumlarının “qaynar xətt”ləridir.Havalar soyuduqca əhalinin qaz və işıqla bağlı problemləri də artmağa başlayır.Artıq neçə ildir ki, vətəndaşlar kommunal xidmət qurumlarının fəaliyyətindən narazılıq edirlər.Bu qurumların yarıtmaz fəaliyyəti, xidmətdə göstərdikləri laqeydlik və biganəlik, eləcə də işlərini görə bilməmələri insanları təngə gətirib.Həmin qurumların “qaynar xətt”lərinə müraciət etmək isə növbəti problem yaradır. Xatırladaq ki, "qaynar xətt" nömrələrinin yaradılması Azərbaycan Respublikası Prezidentinin 28 iyul 2007-ci il tarixli sərəncamı ilə "Şəffaflığın artırılması və Korrupsiyaya qarşı mübarizə üzrə Milli Strategiya" təsdiq olunub.

Elektron hökumətlə yanaşı “qaynar xətt” əhaliyə xidmət göstərmək əvəzinə, insanların əsəblərini korlayır.Şikayətçilərin ən çox gileyləndiyi “Azəriqaz” İstehsalat Birliyinin 185 və 104 “qaynar xətt” xidmətləridir. Əsasən bu xidmətlə qaz təchizatı sistemində “mavi yanacaq”dan istifadə qaydalarının pozulması, onları doğuran səbəblərin aradan qaldırılması, istehlakçılar arasında mənzillərdə və digər obyektlərdə təbii qazdan düzgün istifadə edilməsi qaydaları, eləcə də qaz təsərrüfatında yaranmış problemlərlə bağlı abunəçiləri maraqlandıran suallara cavab verilir. Bundan əlavə mənzillərdə baş vermiş hər hansı qəza və problemlərlə bağlı bu xidmətə müraciət olunur.

Elektrik enerjisinin verilişində problem yaranan zaman “Azərişıq" Açıq Səhmdar Cəmiyyətinin "qaynar xətti"nə müraciət edilir. Ancaq bu qurumun "qaynar xətti"nin hər zaman aktiv olduğunu, edilən bütün zənglərə cavab verildiyini demək olmaz. Söhbət bu qurumun 24 saat fəaliyyət göstərdiyi deyilən 199 nömrəli "qaynar xətti"indən gedir.Vətəndaşlar dəfələrlə həmin xətlərə zəng edib, problemlə bağlı suallarına cavab almaq istəyirlər.Bir neçə saat ərzində davamlı olaraq həmin nömrələri yığanda isə zənglərə cavab verən “qaynar xətt” işçiləri abonenti başından etmək üçün sadəcə, problemi dinləyir.Nəinki müraciətlə bağlı qeydiyyat aparmır, heç zəng edən vətəndaşın kimliyi ilə, problemin hansı ünvanda baş verməsi ilə də maraqlanmırlar.Halbuki telefon danışığında əməkdaşlarını problem olan əraziyə göndərəcəklərini bildirirlər.Bəzən “qaynar xətt” işçilərinin abonentləri məsxərəyə qoyması ilə bağlı da şikayətlər eşidirik.Şikayət edən abonentlərin sözlərinə görə “qaynar xətt” işçiləri onların müraciətləri əsasında xidmət göstərmək əvəzinə, əksinə onlara irad tutur ki, “o vaxt da qaz olmayıb, insanlar necə yaşayıb, siz də dözün”.

Bəllidir ki, “qaynar xətt”lər vətəndaşlarla daha rahat və çevik formada əlaqə saxlamaq, yaranmış problemlərlə bağlı onları maraqlandıran suallara dərhal cavab vermək məqsədilə yaradılıb.“Qaynar xətt”lərdən isə yararlanmaq hər bir vətəndaşın borcudur.Amma vətəndaşlar bizim “qurumların qaynar xətt”lərindən yararlana bilmədiklərindən gileylənirlər.

Qış mövsümündə qaz və işıqla bağlı yaranmış hər hansı problemi aradan qaldırmaq üçün o qurumların “qaynar xətt”ləri daha operativ işləməlidir.Maraqlıdır, onların fəaliyyətsizliyindən aidiyyatı olan qurumların özləri xəbərdardırlarmı? Xəbərdar olsalar belə, kim “öz ayranına turş deyər ki?”.

Dəfələrlə bununla bağlı sözügedən qurumların da açıqlamaları olub ki, “qaynar xətt”in fəaliyyətinə ciddi nəzarət olunur.Amma onların əhaliyə xidmətinin keyfiyyətində heç bir dəyişiklik yoxdur.Ekspertlərin bu məsələdə abonentlərə tövsiyyəsi ondan ibarətdir ki, kommunal xidmət qurumlarının “qaynar xətt”ləri ilə bağlı narazılıqlarını rəsmi olaraq lazımi orqana bildirməlidirlər. Nə qədər şikayət çox olarsa, o zaman hərəkətə keçilər...
Cebhe.info