“Azərbaycan Hava Yolları (AZAL) xidmət sahəsində təlimlərə start verməlidir. Məsələn, qardaş Türk Hava Yollarında istər beynəlxalq uçuşlar, istərsə də daxili uçuşlarda çalışan stüardessalar həm gənc, həm də öz ana dilində danışır və eyni zamanda göstərdikləri xidmət də uçuş boyu sərnişinlərin ürəyincə olur. Bu, digər beynəlxalq hava yollarında da belədir”. Teref.az xəbər verir ki, b sözləri “Şərq”ə açıqlamasında qida texnoloqu Ağa Salamov deyib.

Onun narazılığına görə, AZAL-ın personalının 70 faizinin yaşı çox, həm də xidmət sahəsindən anlayışı olmayan və öz ana dilində deyil, sərnişinlər ilə rus dilində danışan personaldan ibarətdir: “Çox az hallarda hansısa ölkəyə səfərə gedəndə AZAL uçuşlarından istifadə edirəm. Adətən Ukrayna, Türkiyə və s. hava yollarına üz tutmuşam və məmnun da qalmışam. Ancaq son zamanlar məcburiyyət qarşısında sizin hava yollarından istifadə edirəm, yenə də həmişə olduğu kimi öz ənənənizə sadiq qalmısınız. Azərbaycan dilini zəif bilən personal, yanımda oturan sərnişinin qidasını mənim dizimin üstünə qoyan personal, yerə düşən qidanı təkrarən yerdən alıb azyaşlı uşağa uzadan personal və s.

Təlim bütün sahələrdə vacib olduğu kimi xidmət sahələrində də vacibdir. Bunu unutmayın. Hə, bir də istəsəz, sizin personala təmənnasız təlimlər təşkil edə bilərəm. Təki adımızı batırmayın, ən azından sizinlə xarici vətəndaşlar da səyahət edirlər və onların arasında turistlər də var ki, turizmdə də xidmət hava limanından başlayır”.