Bu gün “Milli yol” qəzetinin və “Poliqon” İnformasiya Agentliyinin təsisçisi mərhum Şahin Ağabəylinin doğum günüdür.

O, 1976-cı ildə Neftçala rayonunda anadan olub. 1997-ci ildə Türkiyədə Quru Qoşunları Hərbi Məktəbini bitirib. “Bakı həftəliyi”, “Bizim yol” qəzetlərində çalışıb. 2003-cü ildə “Milli yol” qəzetini, 2006-cı ildə “Poliqon” informasiya agentliyini təsis edib. Şahin Ağabəyli 2010-cu il oktyabrın 27-də Bakı-Astara magistralında, Qaradağ rayonu ərazisində yol qəzasında dünyasını dəyişib. Yaşasaydı 42 yaşı olacaqdı. O, çox qısa, amma əsl kişi ömrü yaşadı. Və bu gün də dostları Şahin Ağabəylini böyük hörmətlə yad edirlər.
Şahin təkcə öz dostlarının, ailəsinin itkisi deyildi. O, Azərbaycan mətbuatının da ağır itkisi idi. Şahinin rəhbərlik etdiyi mətbuat orqanları həmişə kifayət qədər cəsarətli, sözünü deməkdən çəkinməyən və istedadlı yazarların evi olub. Həmin adamlardan da soruşsanız, bu gün Şahin kimi dəlisov bir adamın yoxluğunu hiss etdiklərini deyəcəklər. Şahin qısa ömrünə çox uğur, çox dost sığdırmağı bacaran insan idi. O, evdən gedən yox, eldən gedən oğul idi”.
Tanrı ruhunu şad etsin!