Milli Məclisin deputatı Aqiyə Naxçıvanlı iyunun 4-də Türkiyənin Bakıdakı səfirliyində Dünya Səhər Yeməyi Günü münasibətilə keçirilən tədbirdə süfrəyə görə sosial şəbəkələrdəki tənqidi fikirlərə münasibət bildirib.

TEREF.AZ-ın məlumatına görə, A.Naxçıvanlı Pravda.az-a açıqlamasında deyib ki, Dünya Səhər Yeməyi Günü Türkiyədə mütəmadi qeyd olunan ənənəvi bir bayramdır.

“İyunun 3-də Türkiyədə cənab Rəcəb Tayyib Ərdoğanın andiçmə mərasimi oldu. Türkiyənin Azərbaycandakı səfiri Cahid Bağcı və həyat yoldaşı Leyla Bağcı Milli Məclisin xanım deputatları ilə həmin sevincli günü bölüşmək istədilər. Burada nə pis bir şey var ki, birmənalı qəbul olunmayıb? Mən də orada iştirak etmişəm. Həmin gün onlarda bayram hesab olunur. Mən də istərdim ki, belə bir bayramı biz də öz vətənimizdə tətbiq edək. Biz onları təbrik etdik, fikirlərimizi bölüşdük. Cənab səfir də Türkiyədə qadınların fəaliyyəti, ümumiyyətlə, qadınları hansı problemlərin narahat etməsi barədə fikirlərini bölüşdü. Biz də öz problemlərimizdən danışdıq. Tədbirdən məmnunluqla qayıtdıq. Başa düşmürəm ki, belə bayramları niyə keçirmək olmaz? Niyə belə düşünürlər?”, - deputat bildirib.

A.Naxçıvanlı sözügedən tədbirdə yemək çeşidlərinin çox olmasını israf kimi dəyərləndirənlərə isə belə cavab verib: “Əksinə, orada heç bir israfa yol verilməmişdi. Masaya pendir, zeytun çeşidləri, pomidor, xiyar, pomidor-yumurta, qayğanaq və s. qoyulmuşdu. Sonra çay, kofe gətirdilər. Bəlkə, süfrəni zəngin görüblər? Çünki dördkünc masa idi. Masanın üzəri sıx düzülməli idi ki, 20 nəfər qadın masa arxasında əyləşə bilsin. Heç bir israfçılıq yox idi. Əksinə, xüsusən toylarda israfçılığa yol verən bizik. Dünya Səhər Yeməyi Günü Türkiyədə ənənəvi milli bayrama çevrilib, gözəl bir gündür. Hətta bir neçə deputat istədi ki, bizdə də belə bayramlar keçirilsin. Bununla qadınların bir yerə toplaşaraq fikir mübadiləsi aparmaq imkanı ola bilər. Cəmi iki saat orada olduq, hətta daha az. Əsas siyasətdən danışdıq. Çox yaxşı tədbir idi, nahaq yerə elə sözlər yazıblar”.