“Məktəblərdə kişi müəllimlərin az olmasının gələcəkdə hər hansı problem yaradacağını düşünmək nikbin yanaşmadır. Çünki bunun fəsadları artıq yaranıb. Uzun illərdir ki, biz bunun fəsadlarını müşahidə edirik. Bizim vaxtımızda müəllimlərin 70-80 faizi kişi idi, çünki o vaxt müəllimə böyük hörmət var idi, onlara şərait yaradılmışdı”.

Bu sözləri Azsabah.com-a tanınmış yazıçı Seyran Səxavət deyib. Ölkənin ümumi təhsil müəssisələrində müəllimlərin 82,7 faizinin qadınlar olması barədə danışan yazıçı bildirib ki, bu ciddi problemlər yaradır:

“Yavaş-yavaş müəllimlər hörmətdən düşməyə başladı, xüsusilə şura hökuməti dağılandan sonra bu proses sürətləndi. Artıq universitetlərdə də müəllimlik ixtisasını seçən oğlanlara bir təhər baxırlar. Çünki elçi gedəndə soruşurlar ki, oğlan nəçidir? Müəllim deyəndə qarşı tərəf deyir ki, bizlik deyilsiniz. Biz müəllimi hörmətdən saldıq. O ölkədə ki, müəllimin hörməti yoxdur, həmin ölkənin gələcəyi yoxdur.

Bu gün məktəblərdə nə qədər mənfi hallar baş verir, bunların hamısı kişi müəllimlərin olmaması ilə bağlıdır. Həzrət Əlinin çox sevdiyim bir fikri var: Uşaqlar valideynlərindən çox zəmanəyə bənzəyir. Mühiti də məktəbdə yaradan müəllimlərdir. Müəllimlərin isə az qala 99 faiz qadınlardır.

Amerikada uşaq bağçalarında çalışanlar da kişilərdir, çünki bünövrə belə qoyulur ki, uşaqlar kişi kimi böyüsün.

Bəzən bir adam haqda danışanda deyirlər ki, əşşi, ondan adam olmaz, o, ana uşağıdır. Bu gün bağçada, məktəbdə, universitetdə çalışanlar analardır, bu qədər “ana uşaqları” ilə biz hara gedəcəyik?”

S.Səxavət bildirib ki, müəllimlərin məvaciblərinin azlığı kişi pedaoqların təhsil sahəsindən uzaqlaşmasına səbəb olur. Bu problemi həll etmək, kişiləri məktəblərə qaytarmaq üçün ilk növbədə onların əmək haqlarını artırmaq lazımdır:

“Bu problemin həllinin çox sadə yolu var: yaxşı maaş.

Mən 1974-cü ildən 1976-ci ilə qədər İranda tərcüməçi işləmişəm. 50 il bundan əvvəl orada ibtidai sinif müəllimi 6000 tümən maaş alırdı. O vaxt İranda qızılın bir qramı 2 tümən, dəbdə olan VAZ 2106 markalı avtomobilin qiyməti 12 000 tümən idi. İbtidai sinif müəllimi iki aylıq maaşı ilə bir maşın ala bilirdi.

Bizdə təhsil sahəsində olan bu problem çoxdan başlayıb, artıq bu yara metastaz verir. Kişi müəllimləri məktəblərə cəlb etmək üçün onlara yaxşı pul vermək lazımdır. Müəllimə ayda 4-5 min manat maaş verilsə, görün necə mələyə-mələyə işləməyə gedəcəklər. Belə olsa, mən də bu yaşımda gedib müəllim işləyərəm”.