Yeniçağ.az “2:1” adlı yeni layihəyə start verir: ya bizə verən Allah, ya da müsahibə… Amma məqsədimiz kimisə nokauta salmaq deyil, sadəcə olaraq, onun özünü tanıtmasına tam şərait yaratmaqdır. Bunun üçün də bizə nə lazımdır? Müsahibə tam sərbəstlik vermək, vacib mövzu dairəsində sınamaqdır.

“Büyükfırat” Restoranlar Şəbəkəsinin dəstəyi ilə hazırlanan və Xaqani Ticarət Mərkəzində yerləşən adı çəkilən restoranda baş tutan layihədə ilk qonağımız gənc aktrisa, bir çox yerli serialların baş qəhrəmanı Cəmilə Tağızadədir.

C.Səlimqızı:

– Yarım saatdır səni gözləyirik, demək punktual deyilsən…

– Deyim ki, yüz faiz punktualam, yalan olar. Çünki Bakının tıxacları ilə bu, mümkün deyil.

– Cəmilə, adətən sual xoşuna gəlməyəndə reaksiyan necə olur?

– Susuram.

– Görək susacaqsan, yoxsa, bizi susduracaqsan?

– Susdurmaqla aram yoxdur. Əsas odur ki, sual mənə uyğun olsun. Amma sual qarşısında aciz qalmıram, sadəcə bəzi məqamlarda susmağa üstünlük verirəm.

– Eynşteynin sözüdür: ağıllı insan problemi həll edir, müdrik isə problemin qarşısını alır… Sən hansındansan?

– Desəm ki, həm ondan, həm bundanam, bir az çox olar. Məncə ağıllıyam. Ümumiyyətlə, problemdən qaçıram, amma yenə də məni tapır.

– Təkbaşına həll edirsən?

– Bütün işləri özüm həll edirəm. Anam mənə dəstəkdir – həm maddi, fiziki və mənəvi cəhətdən.

– Arada müflis eləmirsən?

– Edirəm. Ona görə özümə maşın ala bilmirəm də. Onun toyu, bunu ad günü… çatdırmaq olmur.

– Saytları izləyirsən?

– Ölkədə baş verən xəbərləri izləyirəm.

– Hansı saytlardan xəbərin var?

– Elə sizin saytı, “Milli.az”, “Qafqazinfo”, bir də “Axşam.az”ı izləyirəm.

– Məsələn, hansısa ölkədə baş verən terror hadisəsi səni maraqlandırır?

– Hə, izləyirəm, amma onu da deyim ki, bu, siyasət deyil, insanlıqdır.

– Bəs kriminal xəbərlər?

– Mən hətta kriminal filmlərə də baxmıram, çünki qan tökülən yerlərdən qaçıram.

A. Zeynalov:

– Qonorarın əziyyətinə dəyir?

– Yox dəymir, amma sevdiyim işlə məşğulam. Ona qalsa, bizə 30-50 milyon verən olmayacaq. Bizdə şərt budur, Türkiyə deyil ki, aktyor həftəyə 30-50 min alsın və şərtləri diktə eləsin.

– Sənətdən başqa maraq dairənizə nələr daxildir?

– Hazırda Alpaqut Federasiyasında mədəniyyət departamentin rəhbəriyəm. Onu da deyim ki, alpaqut qədim türk döyüş növüdür.

– Özünüz hansısa idman növüylə məşğul olursunuz?

– Uşaq vaxtı taekvando və karate ilə məşğul olmuşam.

C. Səlimqızı:

– Sənin qabağında dayanmaq olmaz ki… Birdən Araz səni sualı ilə hirsləndirdi, fiziki hərəkətə keçə bilərsən?

– Balaca qarışqanı əzə bilmərəm. Hətta uşaq olanda buna görə ağlayırdım, o ki qalmışdı kimisə döyüm.

– Onda Araz siyasətdən sual ver.

A.Zeynalov:

– Siyasətdən özünüzü kənar göstərməyiniz…

– (Sözünü ağzında qoyur) Gəlin bu barədə danışmayaq. Yaradıcılıqdan sual verin.

– Türkiyədə bu günlərdə ciddi hadisə oldu, nə baş verdiyini bildiz?

– Məlumatım var, amma qəti şəkildə siyasi suallara cavab verməyəcəm.

C. Səlimqızı:

– Qorxursan məlumatsızlığın üzə çıxar?

– Sadəcə, siyasi səhvə yol verə bilərəm. Ürəyimdən keçəni söyləyirəm, birdən başqa cür səslənə bilər.

A. Zeynalov:

– Sənət adamları niyə siyasətdən uzaqdır?

– Başqa sual verin.

– Bəlkə siyasətdən danışmamaq üçün sizə şərt qoyulub?

– Yox öz şərtimdir.

– Seçkilərə gedirsiz?

– Gedirəm.

– Öz deputatızı tanıyırsız?

– Nəsimi rayon ərazisində yaşayıram, amma yox, tanımıram.

– Səs verməmisiz?

– Mən yalnız prezidentə səs verirəm, onu dəstəkləyirəm.

– Deyim ki, görünüşünüz istənilən partiyaya gözəl imic də gətirə bilər.

– (gülür)…

C. Səlimqızı:

– Bəs partiya rəhbərlərini tanıyırsan?

– Başqa suala keçin.

– Birinci ledilərdən kimləri tanıyrsan ?

– Mehriban xanımın görünüşü, xanımlığı, oturuşu-duruşu savadı məni valeh edib. Həm də çox dəbli geyinir.

A.Zeynalov:

– 30 il əvvəl sənətdə sərbəstlik yox idi; təsəvvür edin ki, sovet dövrü qayıdır, yaşamaq necə olardı?

– Çox çətin.

– Hər şeyin qadağan olunduğu həmin cəmiyyətdə özünüzü harada görürsünüz?

– Əslində, sovet dönəmində elə də qadağalar yox idi axı.

C.Səlimqızı:

– Niyə ki, kifayət qədər qadağalar olub. Məsələn, seks sözü qadağan idi. Sənət adamına açıq-saçıq geyiminə görə illərlə qadağa qoyulurdu. Bu gün sənətçilərin çılpaq fotoları yayılır, heç qadağa qoyan da olmur.

– Mənim öz qadağalarım var: içmirəm, siqaret çəkmirəm, – elə sovet adamı kimi bir şeyəm.

A. Zeynalov:

– Onu deyirəm də… Təsəvvür edin, dövr dəyişir sizə qadağalar qoyulur ki, bunu geyinmək olar, bunu olmaz. Axı sizin də kifayət qədər açıq-saçıq şəkilləriniz var?

– (üzü dönür) Nə? Mənim açıq-saçıq şəkillərim var ki?

C. Səlimqızı:

– Dekolte, qısa ətəkləri deyir…

– Siz o paltarlara açıq-saçıq deyirsiz? Bütün kişilər elə geyinmiş arvadları ilə toylara gedirlər. Mən nə vaxt alt geyimində çəkildim?

– Araz “cəsur geyimlər” demək istədi…

– Qısaqola açıq-saçıq deyirsiz? Bura İran deyil e qardaş. Açıq-saçıqlıq alt geyimində, dəniz kənarında çəkilən çılpaq fotolardır. Buna razılıq vermirəm. Dünyaşöhrətli ulduzları izləyirəm, onlar belə fotolar çəkdirir. Normal da baxıram. Amma mənim öz çərçivəm, öz qanunlarım, həyat tərzim var. O qanunları özüm qoymuşam. Alkoqol içmirəm, klublarda veyllənmirəm, qəlyan çəkmirəm, vaxtımı sənətimə ayırıram.

– Sənə geridə qalmış kimi baxmırlar?

– Baxırlar. Hətta uzun ətək geyinəndə deyirlər ki, “gəldi də nənəxanım”. Deyirlər, “bütün respublika dəyişdi, bir dənə bu dəyişmədi”. Tərzim retro stilidir. Mən kaş ki, 50-60-cı illərdə yaşayaydım.

– Bəlkə cəmiyyətdən, söz-söhbətdən qorxursan?

-Yox.

– Ay Cəmilə, başqa ölkələri bilmirəm, bizdə məşhur bir ifadə var: “evdəqalmış”, müəyyən yaş həddindən sonra…

– (sözümü tamamlayır) Başlayırlar suallara ki, niyə ərə getmirsən? Ərə gedəndən sonra da soruşurlar, niyə uşağın olmur? Ona görə də bizdə heç kim öz həyatını istədiyi kimi yaşaya bilmir.

– Sənə “evdəqalmış” damğası vurmaq üçün neçə ilin qalıb?

– Mən 50 yaşına qədər seviləcəm və gözəl qalacam.

– Yəni o vaxta qədər evdə qalmaq fikrin var?

– Yox, o vaxta kimi nəvələrim də olacaq. Planlaşdırılır.

A. Zeynalov:

– “Planlaşdırılır” deyərkən?

– Bu ilə artıq qərar veriləcək.

– Birdən eləsi oldu, sənətinə qadağa qoydu?

– Mən eləsini seçmərəm axı.

C. Səlimqızı:

– Sevgi sifarişlə olmur axı?

– Məndə hər şey planlaşdırılır. Sevib ailə həyatı qurmayacam, əsas odur xasiyyətimə uyğun olsun. Mütləq deyil, dünya gözəli ya da milyonçu olsun.

– Acından ölsün?

– Bir pillə məndən yüksək olsun, bilim uşaqlarım çoldə ac-yalvac qalmayacaq. Mən dəli sevgi yaşamamışam. Sənətim birinci yerdədir, ikinci yerdə şəxsi həyatım, yəqin sonra fikrim dəyişəcək.

A. Zeynalov:

– Bu gün nəzərdə tutduğun karyeranın hansı pilləsindəsiz?

– İstədiklərimin 10 faizini etmişəm 90 faizi qabaqdadır. 29 yaşım var, amma hələ çox şey eləyə bilərəm. Onu da deyim ki, bu yaşda olsam da obrazlarım 18-20 yaşındadır.

– Maşallah, elə bildim universiteti təzə bitirmisiz.

C.Səlimqızı

– Bu kişilər də kimi görür deyir ki, yaşınızdan cavan görünürsünüz. Araz məni də nəzərə al, kompliment edəndə…

A. Zeynalov:

– Səninlə bağlı vəziyyəti düzəldərik. Cəmilə xanım, sizə gəldikdə isə sözlərim doğrudan da şablon deyil.

– Mən qrimsiz lap uşağa oxşayıram.

– Sosial şəbəkədə sizi narahat edənlər çox olur?

– O qədər… Hətta polisə də müraciət etmişəm. Amma yenə xeyri olmur, yazırlar ki, səni çox istəyirik, ölürük səndən ötəri. Hansı ki yarımay efirdə olmasam yadından çıxaracaq e, yalandan deyir.

– Cəzalandırdılar o adamı?

– Yox, üstünə getmədim, çünki vaxtım yoxdur. Əsəblərimi itirməkdənsə, düşündüm ki, bu zamanı yaradıcılığıma sərf edim.

– YAP-çı deputat Siyavuş Novruzov təklif edib ki, sosial şəbəkələrdə qeydiyyat şəxsiyyət vəsiqəsi əsasında olsun. Nə deyirsiz?

– Məndə rəsmi səhifələrimdir, gizlin işim yoxdur. Elə olsa, lap gözəl… İnsanlar qorxarlar, ağızlarına gələni yazmazlar.

– Sosial şəbəkədə adətən, paylasımlarınız nə olur?

– Fotolar, getdiyim tədbirlərdən videolar…

– Birdən qazınız kəsildi, ictimailəşdirirsiz?

– Bəzən.

– Reaksiya olur?

– Heç nə dəyişmir.

C. Səlimqızı:

– Hansısa məmura isin düşəndə kömək edirlər?

– Ağız açmıram, özüm həll edirəm.

– Təşkilatçılıq qabiliyyətin yaxşıdır, bəs millət vəkili olsan, hansı problemi həll edərdin?

– Belə bir fikrim yoxdur. Amma biznes-ledi ola bilərəm. İstərdim çoxlu pulum olsun, fond yaradım.

A.Zeynalov:

– Böyük pullar siyasi iddia yaradır.

C. Səlimqızı:

– Tramp da milyarder idi.

– Mənim elə planım yoxdur. İstəyirəm ki, Azərbaycana “Qızıl palma”, “Oskar”, “Altun kələbəyi” gətirə bilim.

– Trampın gənc xanımı səncə, onu puluna görə seçib?

– Melani özü bilər.

A.Zeynalov:

– Amma xanımın ona dəstəyi çox oldu.

C. Səlimqızı:

– Sən qoca, amma pullu milyarderi seçərdin?

– Yox.

– Qoca olduğuna görə?

– Hə.

– Yəni Trampa “yox” deyərdin?

– Nəyimə lazımdır.

A.Zeynalov:

– Gecikdiyini görə belə deyirsən?

– Yox.

C. Səlimqızı:

– Amma puluna görə istifadə etmək olardı…

– Puluna görə kimdənsə istifadə etməyi bacarsaydım, özümə milyarder tapıb, bahalı avtomobillərdə gəzərdim, villarda yaşayardım.

– Trampa “yox” deməyin məni lap təəccübləndirdi…

– Bacı mən milyarder ovuna çıxsaydım, tapıb işlərimi görərdim.

– Heç vaxt heç vaxt demə…

– Düzdü, bəlkə hansısa milyarderin oğlu gəlib məni bəyəndi, heç etiraz eləmərəm. Nazir oğluna kim yox deyər ki? Baxır onun insani keyfiyyətinə

– Safura da nazir oğluna ərə getdi.

– Demək, yarısını tapdı. Əslində, kitablardakı sevgi yoxdur – anlaşmaqdır.

– Necədir, şahmat gedişi ilə müqayisə etsək, kim kimi mat etdi?

– Təəssüf ki, şahmat oynaya bilmirəm. Atam nə qədər elədi, öyrədə bilmədi. Çox istədim öyrənim.

A. Zeynalov:

– Qalib olmamaq üçün oyunu təxirə salınmış vəziyyətdə saxlamaq olar.

– Məncə də, siz iki nəfər, mək tək.

A. Zeynalov:

– Yoldaşlıq oyununda məncə, hesab bərabər oldu.

– Rəqibdən razı qaldınız?

– Sizə rəqib kimi baxmırdım.

– Nə xoşunuza gəldi, nə gəlmədi?

– Hər şey xoşuma gəldi, tək siyasi suallardan qıcıqlandım.

C. Səlimqızı:

– Öz aramızda qalacaq, de görüm, niyə siyasətdən xoşlanmırsan?

– Cenifer Lopez də heç vaxt siyasi sualları cavablandırmır. O, Rusiyaya gedəndə Kseniya Sobçaq ona prezidentlə bağlı sual verdi, Ceylo qəti şəkildə dedi ki, cavablandırmıram. Mən də bu strategiyanı qəbul edirəm.

P.S. Müsahibənin götürülməsinə yaratdığı şəraitə görə “Büyükfırat” restoranlar şəbəkəsinə minnətdarlığımızı bildiririk.