“Ermənistanla Azərbaycan arasında hər hansı ayrıca sənəd imzalanmayıb”.

Qazet.az xəbər verir ki, bu sözləri Ermənistanın baş nazirinin müavini Tiqran Avinyan parlamentdəki çıxışı zamanı deyib.

“Rusiyanın vasitəçiliyi olmadan imzalanan hər hansı sənəddən xəbərdar deyiləm. Təqdim olunan ifadələrə və sənədlərə əlavə olaraq Goris-David Bek (Gorus-Zeyvə – red.) yolu ilə bağlı başqa bir razılaşma var, çünki oradakı yol mübahisəli hissələrdən keçir. Bu, bildiyim yeganə razılaşmadır”, – Avinyan qeyd edib.

O, bütün digər məsələlərdə (xüsusən də Azərbaycanla yeni sərhədlərin qorunması) komissiya iclası və ya fraksiya ilə görüşlər formatında cavablar almaq lazım olduğunu söyləyib.

Avinyanın sözlərinə görə, bu sualların cavabları dövlət sirri ehtiva etdiyinə görə, bu məsələlərin parlamentin tribunasından səsləndirilməsi mümkün deyil.

Xatırladaq ki, bundan əvvəl Ermənistanın keçmiş baş naziri Hrant Baqratyan Kapana (Qafan – red.) səfəri zamanı Ermənistanla Azərbaycan arasında Sünik (Zəngəzur – red.) bölgəsindəki Gorus-Qafan yolunda nəqliyyatın tənzimlənməsi ilə bağlı memorandum imzalandığını bildirmişdi.