İran ABŞ-dan nüvə sazişi ilə bağlı hüquqi təminat istədi
11-04-2022, 08:04
İran parlamenti Vyana nüvə müzakirələrində barışıq üçün müəyyən şərtlər irəli sürüb.
KONKRET.az xarici mediaya istinadən xəbər verir ki, bu barədə “İRNA” məlumat yayıb. 290 yerlik parlamentdə 250 deputatın imzaladığı bəyanatda Assambleyanın mümkün nüvə razılaşması üçün şərtləri qeyd edilib.
Bəyanatda Vaşinqtondan verilən şifahi vədlərin təminat sayılmayacağı bildirilib: “ABŞ gələcəkdə sazişdən birtərəfli qaydada çıxmayacağına dair hüquqi təminatlar verməli və mümkün razılaşmanı Konqres təsdiqləməlidir”.
Həmçinin İranın qurum, təşkilat və şəxslərinə qarşı yeni sanksiyaların tətbiqinə qadağa qoyulması istənilib. İmzaladıqları bəyanatda İranın neft ixracını rahat həyata keçirə bilməsini vurğulayan deputatlar, ABŞ sanksiyaları səbəbindən Tehranın dondurulmuş maliyyə aktivlərinin sərbəst buraxılmasını tələb ediblər.