“Son sutka ərzində Azərbaycan Respublikası silahlı qüvvələrinin bölmələri tərəfindən FURUX qəsəbəsi ərazisində atəşkəs rejiminin 1 dəfə pozulması qeydə alınıb, nəticədə Dağlıq Qarabağ silahlı birləşmələrinin 1 hərbi qulluqçusu yaralanıb. Sülhməramlı kontingentin komandanlığı hər iki tərəfin nümayəndələri ilə birgə insidenti aradan qaldırıb”. Teref.az moderator.az-a istinadla xəbər verir ki, Rusiya Müdafiə Nazirliyinin rəsmi saytının “sülhməramlı”lara aid bölməsində aprelin 19-u Bakı vaxtı ilə saat 20:00-a dair bülletendə belə deyilir.

Atəşkəsin gerçəkdən pozulub-pozulmaması başqa məsələdir. Diqqəti çəkən əsas odur ki, 10 noyabr 2020-ci il üçtərəfli razılaşmasından bəri keçən dövrdə Azərbaycanın rəsmi və qeyri-rəsmi qurumlarının, media və ictimaiyyətinin etirazlarına, o cümlədən Azərbaycan Müdafiə Nazirliyinin martın 26-27-də verdiyi bəyanatlara rəğmən Rusiya MN öz xəbər, bülleten və xəritələrində “Dağlıq Qarabağ” və “Dağlıq Qarabağ silahlı birləşmələri” ifadələrini işlətməkdən əl çəkmir. Həmçinin Azərbayacn MN-in son bəyanatlarında vurğuladığı Azərbaycan Respublikası Xocalı rayonunun Fərrux kəndinin adını yenə də “Furux” kimi işlədir.

Bu isə növbəti dəfə Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyü və sueverenliyinə, eləcə də Rusiya Silahlı Qüvvələrinin Ali baş komandanı V. Putin tərəfindən də imzalanmış 10 noyabr 2020-ci il üçtərəfli bəyannaməyə də hörmətsizlikdir.