İsrailin ədliyyə naziri Yariv Levinin iddialara görə, ABŞ onun ölkəsində hökumətin mübahisəli məhkəmə islahatlarına qarşı etirazları dəstəkləyir.
Avropa.info bildirir ki, ivrit dilində yayımlanan xəbər saytı “Walla” Levinin qapalı iclasdakı çıxışına aid olduğu iddia edilən səs yazılarını yayıb.
Sözügedən səs yazısına görə, Levin “etiraz hərəkatının mətbuata tam nəzarət etdiyini, Ali Məhkəmə, Baş Prokuror, bütün maliyyə sistemi və onlarla əməkdaşlıq edən ABŞ üzərində söz sahibi olduğunu” deyib.
Levin həmçinin məhkəmə tənzimlənməsi üçün mübarizəyə hazır olduğunu və bunun üçün partiya sıralarında birliyin vacib olduğunu bildirib və müxalifəti hakimiyyətin apardığı müzakirələrdə “güzəştə getmək istəməməkdə” ittiham edib.
İsrailin baş naziri Binyamin Netanyahunun oğlu Yair daha əvvəl Vaşinqton administrasiyasının İsraildəki etirazları dəstəklədiyinə dair iddialar səsləndirib və bəzi ABŞ rəsmiləri buna reaksiya verib.
ABŞ Dövlət Departamenti Yair Netanyahunun iddialarından sonra "bu ittihamların tamamilə həqiqətə uyğun olmadığını" bəyan edib.
Respublikaçı senator Ted Kruz isə ABŞ prezidenti Co Baydenə "Anti-Amerikan Braziliya prezidenti Luiz İnasio Lula da Silvanı qarşılamaq yalnız müttəfiqi Netanyahudan üz döndərmək deməkdir" deyib. O, Bayden administrasiyasının rəsmilərinin "İsraildə hökumət əleyhinə etirazları maliyyələşdirməkdən çox kənara çıxdığını" iddia edib.
Yanvarın 5-də İsrailin ədliyyə naziri Yariv Levin tərəfindən elan edilən məhkəmə islahatına Ali Məhkəmənin səlahiyyətlərinin məhdudlaşdırılması və hakim təyinatlarında söz sahibi olmaq kimi dəyişikliklər daxildir.
Baş nazir Benyamin Netanyahu martın 27-də ölkədə kütləvi etirazlara və tətillərə səbəb olan məhkəmə qaydalarını təxirə saldığını açıqlayıb.
Ancaq hökumətin təxirə salınmış tənzimləməni bu ay yenidən parlamentə təqdim edəcəyi gözlənilir.
İsraildə Netanyahunun rəhbərlik etdiyi koalisiyadakı sağçı, ifrat sağçı və ultra-pravoslav partiyalar mübahisəli məhkəmə paketi ilə bağlı hökuməti dəstəkləmək üçün 27 aprel cümə axşamı günü Qərbi Qüdsdə İsrail Assambleyası qarşısında böyük nümayiş keçirib.