Dövlət Departamentinin sözçüsü Metyu Millerin bazar ertəsi bildirdiyinə görə, Birləşmiş Ştatlar diplomatik əlaqələr vasitəsilə ölkələri İrana Yaxın Şərqdə gərginliyin onların maraqlarına uyğun olmadığını bildirməyə çağırıb.

Gündəlik brifinqdə danışan Miller bunun region üçün "kritik an" olduğunu və ABŞ Dövlət katibi Antoni Blinkenin gərginliyi azaltmaq üçün telefonlarla müzakirələr apardığını, eyni zamanda Vaşinqtonun da bütün mümkün hallara hazırlaşdığını deyib.

HƏMAS lideri İsmayıl Haniyənin keçən həftə İranın paytaxtı Tehranda öldürülməsi İsraildən qisas almaq təhdidlərinə səbəb olub və Qəzzadakı münaqişənin daha geniş Yaxın Şərq müharibəsinə çevrilməsi ilə bağlı narahatlıqları artırıb.

İran İsraili günahlandırıb və onu "cəzalandıracağını" bildirib. İsrail rəsmiləri qətlə görə məsuliyyəti üzərinə götürməyib. İran Qəzzada İsraillə müharibə aparan HƏMAS-ı və keçən həftə İsrailin Beyruta endirdiyi zərbə nəticəsində ölən Fuad Şükrün yüksək səviyyəli hərbi komandiri olduğu Livan "Hizbullah"ını dəstəkləyir.

ABŞ-ın yüksək səviyyəli diplomatı bazar ertəsi Qətərin Baş naziri Şeyx Məhəmməd Bin Əbdülrəhman Əl-Tani və Misirin xarici işlər naziri Bədr Əbdülətti ilə Yaxın Şərqdəki gərginliklə bağlı danışıqlar aparıb.

"Danışıqlarımızın bəndlərindən biri ölkələri İrana mesajlar çatdırmağa və ölkələri İrana bu münaqişənin qızışdırılmasının onların maraqlarına uyğun olmadığını izah etməyə çağırmaqdır. Onlar İsrailə qarşı növbəti hücuma keçməkdə maraqlıdırlar" Miller bildirib.

Miller Vaşinqtonun mesajlarının İrana çatdırılıb-çatdırılmadığını və ya hansı kanalla çatdırıldığını açıqlamayıb.

"Mən onlardan bəzilərinin bu mesajı İrana və İran hökumətinə çatdıracağını gözləyirəm" deyə, o əlavə edib.