Respublikaçılar Partiyasından prezidentliyə namizəd Donald Trampa həftə sonu sui-qəsd cəhdi ABŞ-da siyasi zorakılıqla bağlı yeni suallar doğurub. Demokrat və Respublikaçı liderlər ABŞ-ın Məxfi Xidməti üçün daha çox resurs tələb edib.

Prezident Co Bayden bazar ertəsi keçmiş prezident Donald Trampa qarşı ikinci dəfə edilən sui-qəsd cəhdini pisləyib. "Biz Amerikada fikir ayrılıqlarımızı silahla deyil, dinc yolla, seçkilər yolu ilə həll edirik."

ABŞ-ın Məxfi Xidmətinin fəaliyyəti iyulun 13-də Trampa qarşı sui-qəsd cəhdindən sonra Konqres tərəfindən artıq ciddi şəkildə izlənilir. Nümayəndələr Palatasının spikeri Mayk Conson Fox News-a açıqlamasında bu ikinci hadisənin dəyişikliyə ehtiyacı artırdığını deyib. "Düşünürəm ki, Məxfi Xidmətdə həqiqətən vətənpərvər, gözəl insanlar işləyir. Lakin bu, rəhbərlikdir. Bizim inamımız yoxdur".

Tramp bazar ertəsi Fox News Digital-a deyib ki, günah Demokratların ritorikasındadır. Senatda çoxluğun lideri Çak Şumer bazar ertəsi sui-qəsd cəhdini pisləyib. "Amerikada hər hansı siyasi zorakılığa yer yoxdur."

Şübhəli Rayan Rut Trampın Floridadakı qolf meydançasının qarşısında kolluqlarda tüfənglə gizlənməkdə günahlandırılır. 58 yaşlı fəal Ukraynanın Rusiyanın təcavüzünə qarşı mübarizəsində Ukraynanın güclü tərəfdarıdır. O, 2022-ci ildə Newsweek Romania ilə müharibə haqqında danışıb. Ryan Rut, Sui-qəsd cəhdində şübhəli: "Bu münaqişə tamamilə ağ-qaradır. Bu, xeyirlə şərin mübarizəsidir".

Rusiya bazar ertəsi sui-qəsdin ABŞ-a xəbərdarlıq olduğunu bildirib. Kremlin sözçüsü Dmitri Peskov: "Odla oynamağın nəticələri olur."

Hüquq-mühafizə orqanlarının işçiləri jurnalistlərə deyiblər ki, ilk sui-qəsd cəhdindən sonra əlavə edilən təhlükəsizlik tədbirləri bazar günü Trampın qorunmasına yardım edib. Palm Biç mahalının şerifi Rik Bradşou: "Sistem işləyə bilir, çünki şübhəli yaxınlaşıb güllə belə ata bilmədi. Biz onu yaxalayıb, məsuliyyətə cəlb etdik."

Rut bazar ertəsi səhər silah ittihamı ilə bağlı Floridanın federal məhkəməsi qarşısına çıxarılıb.