Çərşənbə axşamı Brüsseldə NATO xarici işlər nazirləri ikigünlük danışıqlara başlayıb. Bu danışıqlarda Ukraynanın təxminən üç il əvvəl başlayan Rusiyanın təcavüzünə qarşı özünü müdafiə etmək üçün mübarizə aparması gündəmdə əsas məsələdir.

Müttəfiqlər artıq görüşlər ərəfəsində yüz milyonlarla dollarlıq yeni hərbi yardım, o cümlədən ABŞ və Almaniyadan yeni yardımlar vəd ediblər.

NATO-nun baş katibi Mark Rutte çərşənbə axşamı jurnalistlərə bildirib ki, müttəfiqlər “sabit dəstəyini davam etdirməlidirlər” və hərbi yardım hazırda ən vacib vəzifədir.

Gündəliyə NATO nazirlərinin danışıqlarından əlavə, Ukrayna rəsmilərinin alyansa üzvlük üçün səy göstərdiyi bir vaxtda NATO-Ukrayna Şurasının iclaslarının son raundu da var.

Ukrayna prezidenti Volodimir Zelenski bazar günü deyib ki, NATO-ya üzv olmaq dəvəti “müharibəyə son qoymaq üçün hər hansı danışıqlardan əvvəl Ukraynanı əsaslı şəkildə gücləndirəcək”.

NATO liderləri dəfələrlə bəyan ediblər ki, Ukraynanın gələcəyi NATO-dadır, lakin Rusiya ilə müharibə davam etdiyi bir vaxtda bu ölkə üzv ola bilməyəcək.

Rutte çərşənbə axşamı bildirib ki, hazırda NATO-nun Ukraynaya hərbi dəstəyi nə qədər güclü olsa, Rusiya ilə sonrakı sülh danışıqlarında Ukraynanın mövqeyi bir o qədər güclü olacaq.

ABŞ Dövlət Departamentinin sözçüsü Metyu Miller bazar ertəsi analoji şərhlər edərək, jurnalistlərə bildirib ki, Birləşmiş Ştatlar "Ukraynaya döyüş meydanında mümkün olan ən güclü mövqeyə nail olmaqda kömək etmək və indi və uzunmüddətli perspektivdə özünü müdafiə etmək qabiliyyətinə malik olmasını təmin etmək" üzərində cəmlənib.

Rutte həmçinin narahatlığını ifadə edib və Rusiyanın hərbi səylərinə xarici dəstəyi pisləyib.

"Çin sanksiyalardan fəal şəkildə yayınır, Rusiyaya ikili təyinatlı mallar tədarük edir və buna görə də Çin, eləcə də İran və Şimali Koreya Rusiyanın Ukraynaya qarşı tammiqyaslı hücumunda iştirak edir," Rutte bildirib.

İran Rusiya qoşunlarını pilotsuz təyyarələrlə təmin edib, Şimali Koreya isə Rusiyaya minlərlə əsgər göndərib.

Cəbhə xəttində Ukrayna rəsmiləri çərşənbə axşamı bildiriblər ki, Rusiya hava hücumları bir gecədə Rivne və Ternopilin qərb bölgələrində enerji infrastrukturuna ziyan vurub.

Dnipropetrovsk vilayətində qubernator Sergey Lısak Telegram-da bildirib ki, Rusiya atəşi və pilotsuz uçan aparat Nikopol şəhərinə düşüb, bir neçə evə, idman zalına, qaz və elektrik xətlərinə ziyan vurub.

Rusiya Müdafiə Nazirliyi çərşənbə axşamı Belqorod vilayətində Ukraynaya məxsus dronu və Bryansk üzərində başqa bir pilotsuz uçan aparatı vurduğunu bildirib.

Bu məqalə üçün bəzi məlumatlar Associated Press və Reuters tərəfindən verilmişdir