ABŞ Prezidenti Donald Tramp şənbə günü TikTok-un alınması ilə bağlı danışıqlar apardığını və çox güman ki, populyar tətbiqin gələcəyi ilə bağlı yaxın 30 gün ərzində qərar verəcəyini bildirib.

“Mən bir çox insanlarla TikTok haqqında danışmışam və TikTok-a böyük maraq var” - Tramp Floridaya uçuş zamanı Air Force One təyyarəsində jurnalistlərə deyib.

Reuters agentliyinin verdiyi məlumata görə, danışıqlar haqda məlumatı olan iki nəfər Tramp administrasiyasının TikTok-u xilas etmək üçün Oracle və bir qrup kənar investorun tətbiqin əməliyyatlarına effektiv şəkildə nəzarəti ələ almasını nəzərdə tutan plan üzərində işlədiyini bildirib.

Mənbələrdən birinin Reuters agentliyinə bildirdiyinə görə, Ağ Ev tərəfindən müzakirə edilən razılaşmaya əsasən, TikTok-un Çində yerləşən sahibi ByteDance şirkətdəki payını saxlayacaq, lakin məlumatların toplanması və proqram təminatının yenilənməsinə TikTok-un veb infrastrukturunu dəstəkləyən Oracle nəzarət edəcək.

Bununla belə, Tramp təyyarədə jurnalistlərə verdiyi açıqlamada Oracle şirkətindən Larri Ellisonla tətbiqin alınması ilə bağlı danışmadığını bildirib.

TikTok-u xilas etmək üçün Oracle və digər investorlarla müqavilə üzərində işləməklə bağlı sualın cavabında Tramp bildirib: “Xeyr, Oracle ilə deyil. Çoxsaylı insanlar, çox hörmətli insanlar onu almaq barədə mənimlə danışırlar və mən yəqin ki, yaxın 30 gün ərzində bu qərarı verəcəyəm. Konqres 90 gün vaxt verib. TikTok-u xilas edə bilsək, düşünürəm ki, bu, yaxşı bir şey olardı”.

Mənbələr bildiriblər ki, Oracle ilə potensial sövdələşmənin şərtləri qeyri-müəyyəndir və dəyişə bilər. Mənbələrdən biri müzakirələrin tam həcminin hələ müəyyən edilmədiyini və ABŞ-da, eləcə də digər bölgələrdə əməliyyatları əhatə edə biləcəyini bildirib.

ABŞ-ın Milli İctimai Radiosu NPR şənbə günü danışıqlar haqda məlumatı olan iki nəfərə istinad edərək, TikTok-un qlobal əməliyyatları ilə bağlı danışıqların aparıldığını bildirib. Oracle tərəfindən hələ şərh verməyib.

Mənbələrin bildirdiyinə görə, müzakirə edilən razılaşmaya ByteDance-in ABŞ-dakı hazırkı investorları cəlb olunacaq.

Müqavilənin şərtlərinə əsasən, Oracle milli təhlükəsizlik məsələlərinin həllinə görə məsuliyyət daşıyacaq. TikTok ilk olaraq 2022-ci ildə Oracle ilə Vaşinqtonun Çin hökumətinin müdaxiləsi ilə bağlı narahatlığını azaltmaq məqsədilə ABŞ istifadəçilərinin məlumatlarını saxlamaq üçün razılaşma əldə edib.

Mənbələrdən biri TikTok rəhbərliyinin qısa formatda video tətbiqi idarə etmək üçün vəzifəsində qalacağını bildirib.

170 milyon amerikalının istifadə etdiyi proqram yanvarın 19-da milli təhlükəsizlik səbəbilə ya ByteDance tərəfindən satılmalı olduğu və ya qadağan edilməsini tələb edən qanunun qüvvəyə minməsindən qısa müddət əvvəl istifadəçilər üçün müvəqqəti olaraq dayandırılıb.

Bir gün sonra vəzifəsinin icrasına başlayan Tramp ABŞ rəsmilərinin ByteDance-ın idarəçiliyində amerikalıların məlumatlarından sui-istifadə riski ilə üzləşdiyi barədə xəbərdarlıq etməsindən sonra tətbiq edilən qanunun 75 gün gecikdirilməsini nəzərdə tutan sərəncam imzalayıb.