Süni mərmər və qranit istehsalı ilə məşğul olan "NB Seramik" MMC "Xalq Bank"dan aldığı kreditin şərtlərinin dətişdirilməsini və müddətinin uzadılmasını istəyir.

Index.az xəbər verir ki, "NB Seramik" 2016-cı ilin iyulun 12-də bankla kredit müqaviləsi imzalayıb. Kredit xətti müqaviləsinin təminatı qismində "NB Holding" ASC torpaq sahəsi üzərində icarə hüququnu banka girov qoyub.

"NB Seramik" MMC-nin kredit xətti müqaviləsi üzrə ödəniş şərtlərinin dəyişdirilməsinə və müddətin əlavə 1 il artırılaraq 12 iyul 2023-cü il tarixədək uzadılmasına ehtiyacı yaranıb.

Zəruri dəyişikliklər edilməsi ilə bağlı 9 avqust 2021-ci il tarixində "NB Holding" ASC səhmdarlarının növbədənkənar ümumi yığıncağı keçiriləcək.

"NB Seramik" MMC 2016-cı ilin dekabr ayında süni mərmər və qranit zavodunu istifadəyə verib. Hüquqi ünvanı Gəncə şəhərində olan "NB Seramik" MMC 2 milyon 142 min manat nizamnamə kapitalına malikdir. Şirkətin qanuni təmsilçisi Məmmədov Anar Şirzad oğludur. Qanuni təmsilçisi Vəliyev Pərviz Şamir oğlunun olduğu “NB Holding” ASC 4 min manat nizamnamə kapitalına malikdir.

"Xalq Bank" 2004-cü ildə yaradılıb. Onun nizamnamə kapitalı 364.773 milyon manatdır. Bankın səhmlərinin 50%-i "İdeal Business Co." MMC-yə ("Xalq Sığorta" ASC-nin 50%-lik səhmdarı), 33.85 %-i "Euro Standard" MMC-yə ("Xalq Sığorta" ASC-nin 50%-lik səhmdarı), 16.15%-i isə "AMAL Invest Group" MMC-yə məxsusdur.